ސަރުކާރުން ޓެކްސީގެ ހިދުމަތް ދިނުމަށް ތައްޔާރުވަމުންދާތީ އެކަމާ ދެކޮޅަށް ޓެކްސީ ޑްރައިވަރުން ހުޅުމާލޭގައި ކުރަމުން ދިޔަ ސުލްހަވެރި މުޒާހަރާގެ ތެރެއިން 3 ޑްރައިވަރުން ހައްޔަރުކޮށް 21 ޓެކްސީއެއް 30 ދުވަހުގެ މުއްދަތަށް ހިފަހައްޓާފައިވާތީ ފުލުހުންގެ އެ އަމަލު މި ޕާޓީގެ ފަރާތުން ކުށްވެރިކުރަމެވެ.
އެއްވެ އުޅުމާއި ސުލްހަވެރި އިޖުތިޖާޖުކުރުމާއި، ހަޅުތާލުކުރުމުގެ ގޮތުން މަސައްކަތް ހުއްޓާލައިގެން ތިބުމަކީ ދިވެހިރާއްޖޭގެ ޖުމްހޫރިއްޔާގެ ގާނޫނުއަސާސީގެ ދަށުން ކަށަވަރުކޮށްދީފައިވާ އަސާސީ ހައްގެކެވެ. ސަރުކާރުން އަމިއްލަ ވިޔަފާރިއެއްގެ ތެރެއަށް ވަދެ، ޓެކްސީގެ ހިދުމަތްދޭ ފަރާތްތަކުގެ ވިޔަފާރި ހުއްޓިގެންދާނޭ ގޮތަށް ރާވާފައިވާ ރޭވުން ތަންފީޒުވެއްޖެނަމަ ޓެކްސީ ޑްރައިވަރުންނަށް ލިބޭ އާމްދަނީ ހުއްޓިގެން ހިނގައިދާނޭތީ ޓެކްސީ ޑްރައިވަރުން ގެންދިޔައީ އެކަން ހުއްޓާލުމަށް ސަރުކާރަށް ގޮވާލުމަށް ސުލްހަވެރި އެއްވުމެއް ބާއްވައި އިހުތިޖާޖުކުރަމުންނެވެ.
ޑިސެމްބަރު 11 ވަނަ ދުވަހުގެ ހަވީރުން ފެށިގެން ބާއްވަމުން ގެންދިޔަ މުޒާހަރާ ފެށުނު އިރުވެސް ފުލުހުން ވަނީ އެ މުޒާހަރާއަށް ހުރަސްއެޅުމަށް މަސައްކަތްކޮށްފައެވެ. އެ މުޒާހަރާ ހުއްޓުވުމަށްޓަކައި ހައްޔަރުކުރި ޑްރައިވަރުންގެ ބަންދާމެދު ގޮތެއް ނިންމަން ކޯޓަށް ގެންދިއުމުން ހުޅުމާލޭ މެޖިސްޓްރޭޓް ކޯޓުން ވަނީ 2 ޑްރައިވަރަކު 5 ދުވަހުގެ މުއްދަތަށް ބަންދުގައި ބޭތިއްބުމަށް ނިންމާފަ އެވެ. ފުލުހުންގެ ފަރާތުން ބުނެފައިވަނީ މި ޑްރައިވަރުންނަކީ ރޭވިގެން މުޒާހަރާކޮށްފައިވާ ބަޔަކަށްވާތީ، އެމީހުންނަކީމުޖުތަމައުގެ ސަލާމަތަށް ނުރައްކާތެރި ބައެއް ކަމަށެވެ.
ޓެކްސީ ޑްރައިވަރުންނަކީ ދުވަހުން ދުވަހަށް ލިބޭ އާމްދަނީއަށް ބަރޯސާވެގެން ދިރިއުޅޭ ބައެއް ކަމަށްވާއިރު، 21 ޓެކްސީއެއް 30 ދުވަހުގެ މުއްދަތަށް ހިފެހެއްޓުމަކީ 21 އާއިލާގެ އާމްދަނީ ހުއްޓުވާލުމެވެ. އެއްގަމު ދަތުރުފަތުރުގެ ގާނޫނުގެ 63 ވަނަ މާއްދާގައި ބުނާގޮތުން ނުރައްކާތެރިކޮށް އެއްގަމު އުޅަނދު ދުއްވައިގެން 30 ދުވަހަށް އުޅަނދު ހިފެހެއްޓުމަކީ އެމާއްދާގައި ބުނެފައިވާ އަދަބު ތަކުގެ އިތުރުން ފުލުހުންނަށް އޮންނަ އިހުތިޔާރީ ކަމެކެވެ. އެ މާއްދާގައި ބަޔާންކޮށްފައި ވާގޮތުން ފުރަތަމަ ފަހަރުނަމަ އަދަބަކީ 2000 ދެހާސް ރުފިޔާއިން ޖޫރިމަނާކުރުމެވެ. ލުއި އަދަބެއް ކަނޑައެޅިފައި އޮއްވައި، އެންމެ ހަރުކަށި އަދަބު އިހުތިޔާރުކޮށްފައިވަނީ ޓެކްސީ ޑްރައިވަރުން ކުރަމުންދާ ސުލްހަވެރި އިހުތިޖާޖު ހުއްޓުވާލައި، އެ އާއިލާތަކަށް ގެއްލުން ދިނުމުގެ ނިޔަތުގައިކަމަށް ދެކެމެވެ.
އެމީހަކު އިހުތިޔާރުކުރާ ވަޒީފާއެއް އަދާކުރުމާއި، މަސައްކަތްކޮށްގެން އާމްދަނީ ހޯދުމުގެ ހައްގަކީ ހަމަކޮންމެ މީހަކަށްމެ ލިބިގެންވާކަމަށް ގާނޫނުއަސާސީން ކަށަވަރުކޮށްދީފައިވާ އަސާސީ ހައްގެއްކަމަށްވާއިރު، އާމްދަނީ ހޯދުމަށްޓަކައި ބޭނުންކުރާ ވަސީލަތްތައް ހިފެހެއްޓުމަކީ، މި މާއްދާގެ ދަށުން ލިބިދޭ އަސާސީ ހައްގަކަށް ހުރަސް އެޅުމުގެ އަމަލެކެވެ.
ސުލްހަވެރި އިހުތިޖާޖުގައި ބައިވެރިވެގެން ހައްޔަރުކުރެވުނު 3 ޓެކްސީ ޑްރައިވަރުންއަށް މި ޕާޓީގެ ފަރާތުން ގާނޫނީ ވަކީލުންގެ އެހީތެރިކަން ފޯރުކޮށްދެމުންދާ ކަމާއި، ޓެކްސީ ޑްރައިވަރުންގެ އުޅަނދުތައް އަނބުރާ ހޯދުމަށް ކުރަންޖެހޭ ގާނޫނީ މަސައްކަތްވެސް މި ޕާޓީގެ ގާނޫނީ ވަކީލުންގެ ޓީމުން ކުރަމުންގެންދާނެ ވާހަކަ މި ފުރުސަތުގައި ފާހަގަކުރަމެވެ.  
ރައްޔިތުންގެ ހައްގުތަކާ ގުޅިފައިވާ މިފަދަ ކޮންމެ ކަމެއްގައި މި ޕާޓީ އަބަދުވެސް ދެމިއޮންނާނީ، ރައްޔިތުންގެ ފަރާތުން ވަކާލާތުކޮށް ރައްޔިތުންނަށް ބޭނުންވާ އެހީތެރިކަން ފޯރުކޮށްދިނުމުގައި ކަމުގައިވެސް ދަންނަވަމެވެ.
ޓެކްސީ ކުރުމުގެ ވިޔަފާރީގެ ތެރެއަށް ވަނުމަށް ސަރުކާރުން ވަނުމަކީ މިޕާޓީން ކުށްވެރިކުރާ ކަމެކެވެ. އެކަމާ ދެކޮޅަށް ޓެކްސީ ޑްރައިވަރުން ކުރާ އިހުތިޖާޖު ހުއްޓުވުމަށްޓަކައި ޓެކްސީ ޑްރައިވަރުން ހައްޔަރުކުރުމާއި، މުދާ ހިފެހެއްޓުމަކީ މި ސަރުކާރުން ހިންގާފާއިވާ ނާތަހުޒީބު ނޭއްގާނީ އަމަލެކެވެ. އެހެންކަމުން، ހައްޔަރުކޮށްފައިވާ ޓެކްސީ ޑްރައިވަރުން މިނިވަންކުރުމަށާއި، ހިފަހައްޓާފައިވާ އުޅަނދުތައް ވަގުތުން ވަގުތަށް ދޫކޮށްލުމަށް ސަރުކާރަށް ގޮވާލަމެވެ.

12 ޑިސެމްބަރ 2024