ދިވެހި ދައުލަތުގެ އެންމެހައި ބާރެއް ފެށިގެން އަންނަނީ އަދި ދެމިއޮންނާނީވެސް ރައްޔިތުންގެ ކިބައިގައި ކަމަށް ގާނޫނުއަސާސީގެ 4 ވަނަ މާއްދާގައި ކަނޑައަޅާފައިވާއިރު، ގާނޫނު ނަންބަރު 25/2024 (ގާނޫނުއަސާސީއަށް 6 ވަނަ އިސްލާހު ގެނައުމުގެ ގާނޫނު) އިން ގާނޫނުއަސާސީގެ 73 ވަނަ މާއްދާއަށް ގެނެސްފައިވާ ބަދަލުގެ ސަބަބުން ގާނޫނުއަސާސީގެ 4 ވަނަ މާއްދާއިން ރައްޔިތުންނަށް ލިބިދީފައި އޮތް ބާރުވެރިކަން ނިގުޅިގެންދާ ހިނދު؛
ރައްޔިތުންގެ މަޖިލީހުގެ މެންބަރުންގެ މަސައްކަތުގެ އަސާސް ބިނާކުރަންވާނީ މުޅި ރާއްޖޭގެ މަސްލަހަތަށް ބަލައިގެން ކަމަށް ގާނޫނުއަސާސީގެ 75 ވަނަ މާއްދާގައި ބުނެފައި އޮތްއިރު، ރައްޔިތުންގެ މަސްލަހަތާ ހިލާފަށް ސިޔާސީ ޕާޓީން އަންގާ ގޮތަށް އަމަލުނުކުރުމުގެ ސަބަބުން ރައްޔިތުންގެ މަޖިލީހުގެ މެންބަރެއްގެ މެންބަރުކަން ގެއްލިގެން ހިގައިދާނެ ހާލަތެއް އުފަންކޮށްފައިވަނީ ގާނޫނުއަސާސީގެ 75 ވަނަ މާއްދާއާވެސް ހިލާފަށްކަމަށްވީހިނދު؛
ރައްޔިތުންގެ މަޖިލީހުގެ މެންބަރަކު އެ މަޖިލީހުގައި ދައްކާ ވާހަކައެއްގެ ސަބަބުން ނުވަތަ އަމަލުކުރާ ގޮތެއްގެ ސަބަބުން އެ މެންބަރެއްގެ މައްޗަށް އެއްވެސް ތަހުގީގެއް ހިންގައިގެން ނުވާނޭކަމަށް ގާނޫނުއަސާސީގެ 90 ވަނަ މާއްދާގައި ބަޔާންކޮށްފައި އޮތްހިނދު؛
ގާނޫނުއަސާސީއަށް މި ގެނެވުނު ބަދަލަކީ ރައްޔިތުންގެ ބާރުވެރިކަން ނިގުޅައިގަނެ، ރައްޔިތުންގެ މަޖިލީހުގެ މެންބަރުން ރައްޔިތުންގެ މަސްލަހަތުގައި މަސައްކަތްކުރުމަށް އޮތް މިނިވަން އިހުތިޔާރުވެސް ނިގުޅައިގަންނަ، އަދި ގާނޫނުއަސާސީގެ އަސާސީ އޮނިގަނޑާވެސް ހިލާފު އިސްލާހެއްކަމަށްވީނހިދު؛
ދިވެހިރައްޔިތުންނަށް ބައިވެރިވެވޭ ޑިމޮކްރަސީއެއް ގާއިމުކުރުމާއި، އަސާސީ ހައްގުތައް ލިއްބައިދިނުމާއި، އެ ހައްގުތައް ހިމާޔަތްކޮށްދިނުމުގެ ގޮތުން ކުރަންޖެހޭ މަސައްކަތްކުރުމަކީ، މި ޕާޓީގެ މަގުސަދެއްކަމަށް ދިވެހި ރައްޔިތުންގެ ޑިމޮކްރެޓިކް ޕާޓީގެ އަސާސީ ގަވާއިދުގެ 10 ވަނަ މާއްދާގައި ކަނޑައަޅާފައި އޮތްހިނދު؛
ގާނޫނުއަސާސީއަށް މިގެނައި ބަދަލު އިހު އޮތްގޮތަށް ރުޖޫއަކުރުމަށް ރައްޔިތުންގެ މަޖިލީހަށާއި، ދިވެހިރާއްޖޭގެ ސަރުކާރަށް ގޮވާލުމަށާއި،

ގާނޫނުއަސާސީއަށް މި ގެނައި ބަދަލު އިހުއޮތްގޮތަށް ރުޖޫއަކުރުމާ ހަމައަށް، މުޅި ރާއްޖޭގެ އެކި ކަންކޮޅުތަކުގައި އިހުތިޖާޖުކުރުމުގެ ގޮތުން އެކިއެކި ސިޔާސީ ހަރަކާތްތައް ހިންގަމުން ގެންދިއުމަށާއި، މި ބަދަލުގެ ސަބަބުން ނުކުންނަ ނަތީޖާތަކާމެދު ރައްޔިތުން ހޭލުންތެރިކުރުވުމަށް ފުޅާ ދާއިރާއެއްގައި ކެމްޕޭނު ހިންގުމަށާއި،

ދިވެހިރައްޔިތުންގެ ޑިމޮކްރެޓިކް ޕާޓީން އިސްނަގައިގެން ހިންގާ މި ހަރަކާތުގައި ބައިވެރިވުމަށް ދިވެހިރާއްޖޭގައި ރަޖިސްޓްރީކޮށްފައިވާ ސިޔާސީ ޕާޓީތަކަށާއި، މަދަނީ ޖަމިއްޔާތަކަށާއި، ފަންނީ ދާއިރާތަކުގެ ބޭފުޅުންނަށް ދައުވަތުދިނުމަށާއި،
ދިވެހިރައްޔިތުންގެ ޑިމޮކްރެޓިކް ޕާޓީން ދޭ ދައުވަތު ގަބޫލުކުރާ ޕާޓީތަކާއި މަދަނީ ޖަމްއިއްޔާތަކާއި ވަކިވަކި ފަރުދުންނާ ގުޅިގެން މުޅި ރާއްޖެއަށް ސިޔާސީ ހަރަކާތްތައް ފުޅާކޮށް، ރާއްޖޭގެ ކަންކޮޅުތަކުގައި އެކިއެކި އިހުތިޖާޖުތައް ރާވައި ހިންގުމަށާއި،
ގާނޫނުއަސާސީއަށް މި ގެނައި ބަދަލު ދެމި އޮންނަ މުއްދަތުގައި، ރައްޔިތުންގެ މަޖިލީހުގެ މެންބަރަކު ރައްޔިތުންގެ ހައްގުގައި ވަކާލާތުކުރުމުގެ ގޮތުން ބުނި ބަހެއްގެ ސަބަބުން ނުވަތަ ވޯޓު ދިނުމުގައި އަމަލުކުރި ގޮތެއްގެ ސަބަބުން އެ މެންބަރަކު ނިސްބަތްވާ ސިޔާސީ ޕާޓީއިން ވަކިކުރުމުގެ ސަބަބުން، ނުވަތަ ރައްޔިތުންގެ މަސްލަހަތުގައި މި ޕާޓީން ކުރަމުން ގެންދާ މަސައްކަތާ ބައިވެރިވުމުގެ ގޮތުން، އެ މެންބަރަކު ނިސްބަތްވާ ޕާޓީއަކުން ވަކިވެ، ދިވެހިރައްޔިތުންގެ ޑިމޮކްރެޓިކް ޕާޓީގެ މެންބަރަކަށް ވުމުގެ ސަބަބުން، އެ މެންބަރަކު ރައްޔިތުންގެ މަޖިލީހުގެ މެންބަރުކަމުން ވަކިވެއްޖެނަމަ، އެ މެންބަރަކު ތަމްސީލުކުރި ދާއިރާއިން ރައްޔިތުންގެ މަޖިލީހަށް މެންބަރަކު އިންތިހާބުކުރުމަށް ބާއްވާ ބައި އިލެކްޝަނުގައި، ރައްޔިތުންގެ މަޖިލީހުން ވަކިކުރެވުނު މެންބަރު ވާދަކުރާނަމަ މި ޕާޓީއިން އެ މެންބަރަކަށް ތާއީދުކުރުމަށާއި، އެ މެންބަރަކު އަލުން ރައްޔިތުންގެ މަޖިލީހަށް އިންތިހާބުކުރުމަށް ދިވެހިރައްޔިތުންގެ ޕާޓީގެ ފަރާތުން އެ މެންބަރަކާއެކު މަސައްކަތްކޮށްދިނުމަށް އެއްބަސްވެ،
މަތީގައި ބުނެވުނު އެންމެހައި ކަމެއް ކުރުމަށް ދިވެހިރައްޔިތުންގެ ޑިމޮކްރެޓިކް ޕާޓީގެ ގައުމީ މަޖިލިސް އިގުރާރުވަމެވެ.

ހުށަހެޅީ : އަލްއުސްތާޛު މަހުފޫޒު ސައީދު ( ކޮލަމާފުށި ދާއިރާގެ ރައީސް )

ތާއީދު ކުރީ : މާރިޔާ އަޙްމަދު ދީދީ ( ކުރީގެ ޑިފެންސް މިނިސްޓަރ / ގަލޮޅު އުތުރު ދާއިރާގެ ރައީސް)

މިޤަރާރަކީ ޤައުމީ މަޖިލީހުގެ 4 ވަނަ ދައުރުގެ 18 ވަނަ ޖަލްސާއަށް ޙާޟިރުވި 89 މެމްބަރުންގެ އިއްތިފާގުން ފާސްކޮށްފައިވާ ޤަރާރެއް