ފިޗް ރޭޓިންގްސް އިން ދިވެހިރާއްޖޭގެ ކްރެޑިޓް ރޭޓިންގ “ސީސީސީ+” އިން “ސީސީ” އަށް ދަށްކޮށްފައިވާތީ ދިވެހިރައްޔިތުންގެ ޑިމޮކްރެޓިކް ޕާޓީން ކަންބޮޑުވުން ފާޅުކުރަމެވެ. ރިޔާސީ އިންތިހާބަށް ފަހު ފިޗުން ރާއްޖޭގެ ކްރެޑިޓް ރޭޓިން ދަށްކޮށްފައި ނުވާއިރު މިއީ އެމްޑީޕީ ސަރުކާރުގެ މާލީ ސިޔާސަތުތަކަށް ބައިނަލްއަގުވާމީ އިދާރާތަކުގެ އިތުބާރު އޮތް ކަމާއި އިސްލާހީ ފިޔަވަޅުތައް ތަންފީޒު ކުރާނެ ކަމުގެ ޔަގީންކަން އެ އިދާރާތަކަށް އޮތްކަން ދައްކުވައިދޭ ކަމެކެވެ. ވޭތުވެދިޔަ 3 މަހުގެ ތެރޭގައި ދެވަނަ ފަހަރަށް، އަދި އެއްފަހަރާ 3 ދަރަޖަ ތިރިއަށް ކްރެޑިޓް ރޭޓިންގ ދަށްކުރުމުން ދައްކުވައިދެނީ މިހާރުގެ ސަރުކާރުން ގެންގުޅޭ ދޯހަޅި ސިޔާސަތުގެ ސަބަބުން މާލީ ހާލަތު އިންތިހާއަށް ގޯސްވަމުންދާކަމެވެ. މާލީ ހާލަތު ގޯސްވަމުންދާކަން ރަމްޒުކޮށްދޭ ކަންކަމުގެ ތެރޭގައި ދައުލަތުގެ ޚަރަދު ބޮޑުވުމާއި، މާލީ އިސްލާހުތައް ލަސްކުރުމާއި، ރާއްޖޭގެ ރަސްމީ ރިޒާވް މެނޭޖްނުކުރެވި ދަށަށް ދިއުމާއި، ބޭރުން ފައިސާ ހޯދުމަށް ނުކުޅެދިފައިވުން ހިމެނެއެވެ.
ރޭޓިންގ ދަށްކުރުމަށް މެދުވެރިވި ސަބަބުތައް:
ފިޗް އިން ދިވެހިރާއްޖޭގެ ކްރެޑިޓް ރޭޓިންގ ދަށްކުރުމަށް ނިންމި ނިންމުމުން އިޤްތިޞާދީ ގޮތުން ކަންބޮޑުވާންޖެހޭ އެތައް ކަމެއް ފާހަގަކޮށްފައިވެއެވެ. ފިޗްއިން ފާހަގަކޮށްފައިވާ ކަންކަމުގެ ތެރޭގައި ބޭރު ފައިސާގެ ރިޒާވް ބޮޑުތަނުން ދަށަށް ދިއުމާއި ބޭރުގެ ދަރަނި އަދާކުރުމަށް ބޭނުންވާ ފައިސާގެ މިންވަރު އިތުރުވުން ހިމެނެއެވެ. ނަމަވެސް، މި ޕާޓީން ދެކޭގޮތުގައި މި މައްސަލަތަކާ ގުޅުންހުރި ކަންކަން ދެނެގަތުމަކީ މި ހާލަތުގެ ނުރައްކާތެރިކަން ވަޒަންކުރުމަށް ވަރަށް މުހިންމު ކަމެކެވެ.
1. ސަރުކާރުގެ ޢަމަލުތަކުގެ ސަބަބުން ފަތުރުވެރިކަމަށާއި އިޤްތިސާދަށް ވީ ގެއްލުން: މިހާރުގެ ސަރުކާރުގެ ޢަމަލުތައް، ޚާއްޞަކޮށް އަވަށްޓެރި އިންޑިއާއާއެކު އޮތް ގުޅުން ހީނަރުވުމުގެ ސަބަބުންނާއި ސަރުކާރުގެ ވެރިންގެ ބަސްމަގުގެ ސަބަބުން ފަތުރުވެރިކަމުގެ ދާއިރާއަށް ނޭދެވޭ އަސަރުކޮށްފައިވެއެވެ. އޭގެ ސަބަބުން ރާއްޖެއަށް އިންޑިއާއިން ޒިޔާރަތްކުރާ ފަތުރުވެރިންގެ އަދަދު ބޮޑުތަނުން މަދުވެ، ރާއްޖޭގެ އިޤްތިސާދީ ކުރިއެރުން މި އަހަރު ދަށްކުރަން ޖެހިފައިވެއެވެ.
2. ބޭކާރު އަދި ރޭވުމެއްނެތި ސަރުކާރުން ކުރާ ޚަރަދުތަކުގެ ސަބަބުން ރިޒާވް ހީނަރުވުން: މިއަހަރު ފަތުރުވެރިކަމުގެ ދާއިރާއަށް ޖުމުލަކޮށް އަންނަ ކުރިއެރުމާއެކު، ޑޮލަރުން ލިބޭ އާމްދަނީ %15 އިތުރުވެފައި ވީނަމަވެސް، ދައުލަތުގެ ޚަރަދު ބޮޑުވުމުގެ ސަބަބުންނާއި ރިޒާވް ސަޕޯޓްކުރުމަށް ބޭނުންވާ ފައިނޭންސިންގ ހޯދުމަށް ސަރުކާރު ނުކުޅެދުމުގެ ސަބަބުން ބޭރު ފައިސާގެ ރިޒާވް މި އަހަރު ވަނީ ވަރަށް ބޮޑަށް ހީނަރުވެފައެވެ. މިގޮތުން، ދަތި ދަނޑިވަޅެއްގައި މި ވަގުތު ސަރުކާރުން ކޮންމެހެން ކުރަންނުޖެހޭ ޚަރަދުތަކެއްވެސް ސަރުކާރުންވަނީ ކޮށްފައެވެ. މީގެ ތެރޭގައި، ބަޖެޓުގައި ނެތް 37 މިލިއަން ޑޮލަރު އަސްކަރީ ޑްރޯންތަކެއް ގަތުމަށް ޚަރަދުކުރުމާއި، ޑެޓް ސްޓްރެޓެޖީއާ ޚިލާފަށް، އިންޑިއާ ސަރުކާރާއެކު ވާހަކަ ނުދައްކަންވެގެން، 50 މިލިއަން ޑޮލަރުގެ ޓްރެޜަރީ ބިލު އިންޑިއާއަށް އަނބުރާ ދެއްކުމުގެ ސަބަބުން ބޭރު ފައިސާގެ ރިޒާވަށް ކުރި އަސަރު ފާހަގަކުރަމެވެ.
3. ފިސްކަލް ރިފޯމް ލަސްކުރުން: ކުރީ ސަރުކާރުން ފަށައިފައިވާ މާލީ އިސްލާހުގެ ޕްރޮގްރާމް މި ސަރުކާރުން ކުރިއަށް ނުގެންގޮސް ވަނީ މަޑުޖައްސާފައެވެ. މީގެ ސަބަބުން ޚަރަދު ކުޑަކުރުމަށް އަޅަން ޖެހޭ ފިޔަވަޅުތައް އަޅަން ޖެހޭ ދަނޑިވަޅުގައި ނޭޅި ފަސްވެފައިވާކަން ފާހަގަކުރެވެއެވެ. އިސްލާހީ ފިޔަވަޅުތައް ނާޅައިފިނަމަ އޭގެ ސަބަބުން ރޭޓިންގ ދަށްވާނެކަން ފާއިތުވި ޖޫން މަހު ވެސް ރޭޓިންގ އެޖެންސީތަކުން ހާމަކޮށްފައިވެއެވެ.
ރޭޓިންގ ރަނގަޅުކުރުމަށް ފިޔަވަޅު އެޅުމަށް ގޮވާލުން
އެމްޑީޕީން ސަރުކާރަށް ގޮވާލަނީ މި ނުރައްކާތައް ކުޑަކުރުމަށް ވަގުތުން ފިޔަވަޅު އަޅަން ފެށުމަށެވެ. މީގެ ތެރޭގައި ބޭކާރު ޚަރަދުތައް ހުއްޓައިލުމަށާއި އަދި މި ވަގުތަށް މުހިންމު ނޫން ހުރިހާ ޚަރަދުތައް މަދުކުރުމަށާއި، މާލީ އިސްލާހުތައް ނުވަތަ ފިސްކަލް ރިފޯމް އަވަސް ކުރުމަށާއި، އަދި ރަހުމަތްތެރި ޤައުމުތަކާއި ބައިނަލްއަޤްވާމީ އިދާރާތަކުގެ އެހީތެރިކަން ހޯދުމަށާއި އަވަސް ގޮތެއްގައި ރާއްޖޭގެ ރިޒާވް ސަޕޯޓްކުރުމަށް ބޭނުންވާ ބޭރު ފައިސާ ހޯދުމަށެވެ. އަދި މީގެ އިތުރުން، ދައުލަތުގެ މާލީ ހިސާބުތައް ޢާންމު ކުރުމަށް އަލުން ފެށުމަށާއި ރައްޔިތުންނަށް ތެދު ހާމަކުރުމަށާއި ދެފުށް ފެންނަ ގޮތެއްގައި ކުރިއަށް ދިއުމަށް ގޮވާލަމެވެ. އަވަހަށް ފިޔަވަޅު ނޭޅިއްޖެނަމަ، މާލީ ހާލަތު އިތުރަށް ދަށަށް ދިއުމާއި، ކްރެޑިޓް ރޭޓިންގ އިތުރަށް ދަށަށް ދިއުމާއި، އަދި އިޤްތިޞާދީ ހާލަތު އިތުރަށް ހީނަރުވުމުގެ ހިރާސް ބޮޑުކަންވެސް ފާހަގަކުރަމެވެ.
ކްރެޑިޓް ރޭޓިންގ މަތިވާނެ ކަންކަމުގެ ގޮތުގައި ފިޗުން ފާހަގަކޮށްފައިވަނީ ބޭރުގެ ފައިނޭންސް ހޯދުމާއި މާލީ އިސްލާހުތައް ގެނައުމުގައި ފާހަގަކުރެވޭ ކުރިއެރުން ހޯދުމެވެ. އެހެންކަމުން މިކަންކަން ލަސްނުކޮށް ކުރުމަކީ މުހިއްމުކަމެކެވެ.
ބަޖެޓަށް ފައިސާ ހޯދުމުގައި ކުރިއެރުން ނުލިބޭކަމާއި، މާލީ އިސްލާހުތައް ލަސްވަމުންދާކަމާއި، އަދި މިހާރު މާލީ ދާއިރާގައި ހާމަކަން ކުޑަވަމުންދާކަމާމެދު މީގެ ކުރިންވެސް އެތައް ފަހަރެއްގެ މަތިން ކަންބޮޑުވުން ފާޅުކޮށް، އެކަންކަން އިސްލާހުކުރުމަށް މި ޕާޓީން ސަރުކާރަށް ގޮވާލާފައިވާނެއެވެ. ކުރިއަށް އޮތް އަހަރުތަކުގައި މާލީ މެނޭޖްމަންޓަށް ވީ އެންމެ އަވަހަކަށް ރާއްޖޭގެ ކްރެޑިޓް ރޭޓިންގ ރަނގަޅުކުރުމަކީ ވަރަށް މުހިންމު ކަމެއްކަމުގައިވެސް މި ފުރުސަތުގައި ފާހަގަކުރަމެވެ.
ދިވެހިރައްޔިތުންގެ ޑިމޮކްރެޓިކް ޕާޓީން ގޮވާލަނީ ޤައުމުގެ އިޤްތިސާދީ މުސްތަޤުބަލާއި ރައްޔިތުންގެ ދުޅަހެޔޮކަން ރައްކާތެރިކުރުމަށް ސަރުކާރުން އިތުރު ބަހަނާ ނުދައްކައި މަސައްކަތްކޮށްދިނުމަށެވެ.
29 އޮގަސްޓް 2024