އެމްޑީޕީގެ ސީދާ ހަރަކާތުގައި އިއްޔެ ހަވީރު ފުލުހުން ހައްޔަރުކުރި އެމްޑީޕީގެ ސްޕޯކްސްޕާސަން އިންޓަރނޭޝަނަލް އަދި އެ ޕާޓީގެ ޕާލަމެންޓްރީ ގްރޫޕްގެ އަމީން އާންމު، ރައްޔިތުންގެ މަޖިލީހުގެ ހެންވޭރު ދެކުނު ދާއިރާގެ މެންބަރު ހާމިދު އަބްދުލްޣަފޫރު އިތުރު 5 ދުވަހަށް ބަންދުގައި ބަހައްޓަން ކްރިމިނަލް ކޯޓުން މިއަދު އަމުރުކޮށްފިއެވެ.

ހާމިދު ގެ ބަންދުގެ މުއްދަތު 5 ދުވަހަށް އިތުރު ކޮށްފައިވާ އިރު އާދިލް ސަލީމް ވެސް ވަނީ މީގެ ދެ ދުވަސްކުރިން 5 ދުވަހުގެ މުއްދަތަށް ގޭބަންދަށް ބަދަލުކޮށްފައެވެ.

މުލަ ރޯދަ ދުވަހު އެމްޑީޕީން ހިންގި ސީދާ ހަރަކާތުގައި ފުލުހުން ހައްޔަރުކުރި 36 މީހުންގެ ތެރެއިން 31 މީހަކު ރޭ ވަނީ ވަކި ކަމަކަށް ޝަރުތުކޮށް ދޫކޮށްލާފައެވެ. އެއީ 30 ދުވަސް ވަންދެން ރޭނގަޑު 8 ކުން ފެށިގެން ހެނދުނު 8 ކަށް އެއްވެސް އެއްވުމެއްގައި ބައިވެރިނުވުމެވެ.

ސީދާ ހަރަކާތުގެ ތެރެއިން ހައްޔަރުކުރަމުންގެންދާ މީހުން ކޯޓުން ދޫކޮށްލާއިރު ހިޔާލުފާޅުކުރުމާއި އެއްވެއުޅުމުގެ މިނިވަންކަން ގެއްލޭގޮތަށް ކަމަށް ބުނެ މަޝްހޫރު ގާނޫނީ ވަކީލުން ދަނީ ކްރިމިނަލް ކޯޓުގެ ނިންމުންތަކަށް ފާޅުގައި ފާޑުވިދާޅުވަމުންނެވެ.