ތިމަރަފުށީ ދާއިރާގެ ބައި އިލެކްޝަނަށް އެމްޑީޕީގެ ޓިކެޓްގައި ވާދަކުރުމަށް އެ ދާއިރާގެ ކުރީގެ މެންބަރު މުޙައްމަދު މުސްތަފާ (ތިމަރަފުށީ މުސްތަފާ) ގެ އިތުރުން ހޯމް މިނިސްޓްރީގެ ކުރީގެ ސްޓޭޓް މިނިސްޓަރ އަޙުމަދު ޝަފީގު ވެސް ކުރިމަތިލައްވައިފިއެވެ.

މި ބައި-އިލެކްޝަންގައި އެމްޑީޕީގެ ޓިކެޓްގައި ރައްޔިތުން މަޖިލީހުގެ ތިމަރަފުށީ ދާއިރާގެ މެންބަރުކަމަށް ވާދަކުރެއްވުމަށް ބޭނުންފުޅުވާ، ޝަރުޠު ފުރިހަމަވާ ފަރާތްތަކުން އެޕްލިކޭޝަން ފޯމާއި ވަނަވަރުގެ އިތުރުން އިލެކްޝަންސް ކޮމިޝަނަށް ހުށަހަޅަންޖެހޭ އެންމެހައި ލިޔެކިޔުންތައް، އެމްޑީޕީގެ ސެކްރެޓޭރިއަޓަށް ހުށަހަޅަން ހަމަޖެހިފައިވާ ސުންގަޑި ކަމަށްވާ މިއަދު ހަވީރު 4:00 ގެ ކުރިން 2 ފަރާތަކުން ކުރިމަތިލައްވާފައިވާތީ، އެފަރާތްތަކުގެ ލިޔެކިޔުންތައް ފުރިހަމަ ކަމަށް ވާނަމަ ޕްރަމަރީއަކަށް ދާން ޖެހޭނޭ ކަމަށް އެމްޑީޕީން ބުނެއެވެ.

މި ފަދަ ޕްރައިމަރީއެއް ބާއްވަން ޖެހިއްޖެ ޙާލަތެެއްގައި އެ ޕްރައިމަރީ އޮންނާނީ 3 މާރޗް 2012 ވާ އަންގާރަ ދުވަހު ކަމަށް ވެސް އެމްޑީޕީން ބުނެއެވެ. އަދި އެ ޕްރައިމަރީ ކުރިޔަށްދާނީ އެމްޑީޕީގެ އިންތިޚާބާއި ބެހޭ ކޮމިޓީގެ ބެލުމުގެ ދަށުން ކަމަށް ވެސް އެ ޕާޓީން ބުނެއެވެ.