ދިވެހި ދައުލަތުގެ އެންމެހައި ބާރުތައް ފެށިގެން އަންނަނީ ރައްޔިތުންގެ ކިބައިންކަމާއި އަދި އެ ބާރުތައް ދެމި އޮންނާނީވެސް ރައްޔިތުންގެ ކިބައިގައިކަމަށް ގާނޫނުއަސާސީގެ 4 ވަނަ މާއްދާގައި ބަޔާންކޮށްފައިވީހިނދު،
ދައުލަތުގެ 3 ބާރުގެ ތެރެއިން، ގާނޫނު ހަދާ ބާރަށް މަންދޫބުން އިންތިހާބުކޮށް، ދައުލަތް ހިންގުމުގެ އިޖުރާއަތުގައި ބައިވެރިވުމަކީ ގާނޫނުއަސާސީގެ 26 ވަނަ މާއްދާއާއި، 70 ވަނަ މާއްދާގެ ދަށުން ރައްޔިތުންނަށް ލިބިގެންވާ ބާރެއްކަމަށްވީހިނދު؛
ދިވެހިރާއްޖޭގެ ވެރިކަން ހިންގުމަށް ރައްޔިތުން އެއްބަސްވެފައި އޮތީ ރިޔާސީ ނިޒާމަކަށް ކަމަށްވެފައި، ދިވެހިރާއްޖޭގެ ޖުމްހޫރިއްޔާގެ ގާނޫނުއަސާސީ އެކުލަވާލާފައި އޮތީ ރައްޔިތުންގެ ނިންމުމާ އެއްގޮތަށް ރިޔާސީ ނިޒާމަކުން ވެރިކަން ހިންގުމަށްކަމަށް ވީހިނދު؛
ރައްޔިތުންގެ ހިޔާލެއް ހޯދުމެއްނެތި ގާނޫނުއަސާސީއަށް މި ގެނައި ބަދަލަކީ އެ ބަދަލުގެ ސަބަބުން ވެރިކަމުގެ ނިޒާމު މަސްހުނި ނިޒާމަކަށް ބަދަލުވެ، ރައްޔިތުން ނިންމި ނިންމުން ރޫޅިގެންދާފަދަ ބަދަލަކަށްވީހިނދު؛
ރައްޔިތުންގެ މަޖިލީހަށް ރައްޔިތުން އިންތިހާބުކުރާ މެންބަރުން، އެ މެންބަރުންގެ މަސައްކަތުގެ އަސާސް ބިނާކުރަން ޖެހެނީ މުޅި ގައުމުގެ މަސްލަތަށްކަމަށް ގާނޫނުއަސާސީގެ 75 ވަނަ މާއްދާގައި ބުނެފައި އޮތްހިނދު، އެ މެންބަރު ނިސްބަތްވާ ސިޔާސީ ޕާޓީން ބޭނުންވާ ގޮތަށް އަމަލުކުރުން މަޖުބޫރުކުރުވުމަކީ އެ މާއްދާއާ ހިލާފުކަމަކަށް ވީހިނދު؛
ރައްޔިތުންގެ މަޖިލީހުގެ މެންބަރަކު އެ މަޖިލީހުގައި ދެއްކި ވާހަކައެއްގެ ސަބަބުން ނުވަތަ ވޯޓުދިން ގޮތެއްގެ ސަބަބުން އެ މެންބަރެއްގެ މައްޗަށް އެއްވެސް ތަހުގީގެއް ހިންގައިގެން ނުވާނޭކަމަށް ގާނޫނުއަސާސީގެ 90 ވަނަ މާއްދާގައި ބުނެފައިވީހިނދު؛
މެންބަރުން ވޯޓުދޭ ގޮތެއްގެ ސަބަބުން ނުވަތަ ދައްކާ ވާހަކައެއްގެ ސަބަބުން އެ މެންބަރެއްގެ މެންބަރުކަން ގެއްލޭ ގޮތަށް ގާނޫނުއަސާސީ ބަދަލުކުރުމަކީ ދިވެހިރާއްޖޭގެ ގާނޫނުއަސާސީގެ އަސާސީ އޮނިގަނޑާވެސް ހިލާފު ކަމަކަށްވީނހިދު؛
ރައްޔިތުންގެ ރުހުމެއްނެތި ގާނޫނުއަސާސީއަށް މި ގެނައި ބަދަލު ބާތިލުކުރުމަށާއި، ރައްޔިތުންގެ ބާރުވެރިކަން ނިގުޅިގެން ހިނގައިދާނޭފަދަ ހަމަ އެއްވެސް ކަމެއް ނުކުރުމަށް، ދިވެހިރާއްޖޭގެ ޖުމްހޫރިއްޔާގެ ގާނޫނުއަސާސީގެ 4 ވަނަ މާއްދާއިން އައުދާނަކަމާއި ބާރުވެރިކަން ލިބި ތިބި ރައްޔިތުންގެ ހައިސިއްޔަތުން ރައްޔިތުންގެ މަންދޫބުންނަށާއި ދިވެހިރާއްޖޭގެ ވެރިކަން
ހިންގުމަށް ދިވެހިރައްޔިތުން މަތިކޮށްފައިވާ ރައްޔިތުންގެ ހާދިމު، ރައީސުލްޖުމްހޫރިއްޔާ ޑރ.މުހައްމަދު މުއިއްޒުއަށް އަންގައި އަމުރުކުރަމެވެ.

ހުށަހެޅީ: މާރިޔާ އަޙްމަދު ދީދީ ( ކުރީގެ ޑިފެންސް މިނިސްޓަރ / ގަލޮޅު އުތުރު ދާއިރާގެ ރައީސް)

ތާއީދު ކުރީ : މުޙައްމަދު ރާއީ ( މަކުނުދޫ ދާއިރާގެ ރައީސް )

މިޕެޓިޝަނަކީ ޤައުމީ މަޖިލީހުގެ 4 ވަނަ ދައުރުގެ 18 ވަނަ ޖަލްސާއަށް ޙާޟިރުވި 89 މެމްބަރުންގެ އިއްތިފާގުން ފާސްކޮށްފައިވާ ޕެޓިޝަނެއް.