މިނިވަން ނޫސްވެރިކަން ނެތިކޮށްލުމަށާއި ސަރުކާރުން މީޑިއާތައް ކޮންޓްރޯލްކުރުމަށް، "މޯލްޑިވްސް މިޑިއާ އެންޑް ބްރޯޑްކާސްޓިންގ ކޮމިޝަން" އުފައްދާ އަދި ކޮމިޝަނަށް ބޮޑެތި ބާރުތަކެއް ލިބިދޭ ގޮތަށް ސަރުކާރު އަޑީގައި އޮވެ، ދެވަނަ ފަހަރަށް ތުޅާދޫ ދާއިރާގެ މެންބަރ އަބްދުލްހަންނާން އަބޫބަކުރު ލައްވައި މަޖިލީހަށް ވައްދާފައިވާ "މޯލްޑިވްސް މީޑިއާ އެންޑް ބްރޮޑްކާސްޓިންގ ރެގިއުލޭޝަން ބިލް" އަނބުރާ ގެންދިއުމަށް ދިވެހިރައްޔިތުންގެ ޑިމޮކްރެޓިކް ޕާޓީގެ ތުޅާދޫ ދާއިރާ މެންބަރުން ގޮވާލަމެވެ.
ފެހި ޤާނޫނު އަސާސީގައި މުތުލަޤަށް ލިޔެވި ކަށަވަރުކޮށްދީފައިވާ ދުލާ، ގަލަމުގެ މިނިވަންކަމަކީ ދިވެހި ރައްޔިތުން މަގުމަތިން، އިހްތިޖާޖްތަކުގައި، ރަތްދަކަ އަވީގައި، އަގުހުރި ވަގުތާއި، އޮހޮރުނު އެތައްދަލަކުން ހޯދާފައިވާ ޑިމޮކްރަސީގެ ހަތަރުވަނަ ތަނބެވެ. މި ބިރުވެރި ހައްސާސް މަސައްކަތުގެ އެންމެ ކުރީ ސަފުގައި ދިވެހިރައްޔިތުންގެ ޑިމޮކްރެޓިކް ޕާޓީގެ ތުޅާދޫ ދާއިރާ މެމްބަރުންނާއި، ޤައުމީ ރޫހުގައި އިސްލާޙީ މަސައްކަތަށް ތާއީދުކުރި ދާއިރާގެ އެތައް ރައްޔިތުންނެއް ގުނާލެވެއެވެ.
ދިވެހިރައްޔިތުންގެ ޑިމޮކްރެޓިކް ޕާޓީގެ ތުޅާދޫ ދާއިރާގެ މެންބަރުންނާއި، އިސްލާހީ މަސައްކަތުގައި ދެމިތިބި ފަރާތްތަކާ، އަދި ދާއިރާގެ ލޮބުވެތި ރައްޔިތުންގެ ޚިޔާލާއި މަޝްވަރާ ހޯދުމެއްނެތި، ރައީސުލްޖުމްހޫރިއްޔާ އައްޔަނުކުރާ ރައީސަކާ، މެންބަރުން ހިމެނޭހެން އުފައްދާ މި ކޮމިޝަނަށް ބްރޯޑްކާސްޓަރުން ބޮޑެތި އަދަދުތަކުން ޖޫރިމަނާ ކުރުމާއި، ޕްރޮގްރާމް ޝެޑިއުލް އިން ބައެއް ވަގުތީ ގޮތުން މެދުކަނޑާލަން ނުވަތަ ކޮންޓެންޓް ހުއްޓުމަށް އެންގުމާއި އަދި ކޯޓަށް ހުށަހަޅައިގެން ބްރޯޑްކާސްޓިންގ ލައިސަންސް ބާތިލު ކުރެވޭގޮތަށް، މީޑިއާތަކުގެ މިނިވަންކަން ގެއްލޭ ގޮތަށް ހުށަހަޅާ އެއްވެސް ޤާނޫނަކަށް އަޅުގަނޑުމެން ތާއީދެއް ނުކުރަމެވެ. އަދި އެކަން ހަރުކަށި އިބާރާތުން ކުށްވެރިކުރަމެވެ.
ދައުލަތުގެ މުދަލާއި ފައިސާއަކީ ރައްޔިތުންގެ ފުރިހަމަ ހައްޤުތަކެވެ. އެހައްޤުތަަކަށް އަމަނާތްތެރިވެ، ރައްކާތެރިވުމަކީ ދައުލަތުގެ ކޮންމެ މަސްޢޫލިއްޔަތަކާއި ހަވަލުވެހުންެވި ވެރިއެއްގެ ޒިންމާއެކެވެ. މީޑިއާގެ އެންމެ ބޮޑު ދައުރަކީ ރައްޔިތުންނަށް މައުލޫމާތު ހާމަކޮށްދިނުން ކަމުގައިވާތީވެ، ހާމަކުރެވޭ މައުލޫމާތުގެ ސަބަބުން މީޑިއާތައް ބަންދުކޮށް ބޮޑެތި އަދަބުތައް ދެވޭގޮތަށް ބިލެއްފާސްކުރުމަކީ ދައުލަތުގެ މުދަލާއި ފައިސާއަށް ޚިޔާނާތްތެރިވާ ބަޔަކަށް ދެވޭ ވަރަށްވެސް ބޮޑު ރައްކާތެރި ކަމެކެވެ.
ސަރުކާރު ޖަވާބުދަރީ ކުރުވުމުގެ ބަދަލުގައި، މީޑިއާ ރެގިއުލޭޓް ކުރުމުގެ ނަމުގައި މިފަދަ ޤާނޫނެއް ވުޖޫދު ކުޅައުމުގެ އެންމެ އިސްބޭފުޅެއްގެ ގޮތުގައި ތުޅާދޫ ދާއިރާގެ މަޖިލިސް މެންބަރު ހުންނެވުމަކީ މި ދާއިރާއިން ވަކިން ބޮޑަށް ކަންބޮޑުވާ ކަމެއްކަން ހިތާމަޔާއެކު ފާހަގަކުރަމަވެ. ސަރުކާރަށް ފާރަވެރިވެ ޖަވާބުދާރީ ކުރުމުވުމުގެ އެންމެ ބޮޑު ޒިންމާ އަދާކުރާ މިނިވަން މުސްތަޤިއްލު ބާރެއްގެ ގޮތުގައި އަބަދުމެ މިޑިއާ ދެމިއޮންނަން ޖެހެއެވެ.
މީޑިއާތަކުގެ މިނިވަންކަން ގެއްލޭގޮތަށް ތުޅާދޫ ދާއިރާގެ މަޖިލިސް މެންބަރު ރައްޔިތުންގެ މަޖިލީހަށް ހުށަހަޅާފައިވާ ބިލު އަނބުރާ ގެންގޮސް، މީޑިއާތަކަށް ހުރަސް އެޅުމަށް ސަރުކާރުން ރާވައި ހިންގަމުންދާ އެންމެހާ ކަންކަމުން ދުރުވެ ރައްޔިތުންގެ ޙައްޤުތައް ގެއްލޭގޮތަށް ފާސްކުރާ އެއްވެސް ޤާނޫނެއްގައި ބައިވެރި ނުވުމަށާއި، މިނިވަން ކަމާއެކު މަޖިލީހުގައި މަސައްކަތްކޮށް ސަރުކާރު ޖަވާބުދާރީ ކުރުމުގައި ކުރިއަށް ވަޑައިގަތުމަށް، ތުޅާދޫ ދާއިރާގެ މަޖިލިސް މެންބަރަށް މި ފުރުޞަތުގައި ގޮވާލަމެވެ.
ފަހުގެ ނޫސް ބަޔާންތައް
19th August 2025
މިނިވަން ނޫސްވެރިކަން ނެތިކޮށްލުމަށް ސަރުކާރު އަޑީގައި އޮވެ ހުށަހަޅާފައިވާ ބިލު އަނބުރާ ގެންދިޔުމަށް ގޮވާލުން
7th August 2025