މިޞްރުގެ އަޒްހަރު ޔުނިވާސިޓީގެ އެންމެ އިސް ޝައިޚު، ފަޟީލަތުއްޝައިޚު މުޙައްމަދު ޝައިޚު ޠަންޠާވީ ކުއްލި ގޮތަކަށް މިއަދު އަވަހާރަވުމާ ގުޅިގެން މިޕާޓީގެ ފަރާތުން އެމާތް މަރްޙޫމްގެ މައްޗަށް ތަޢުޒިޔާ ކިޔަމެވެ.
އަޅުގަނޑުމެން ދިވެހިންނަކީ ސުންނަތް ޖަމާޢަތުގެ އަހުލުވެރިންކަމަށް ވާއިރު، އައްޝައިޚު ޠަންޠާވީއަކީ އަޅުގަނޑުމެން ދިވެހިން ތަބާވާ ސުންނަތް ޖަމާޢަތުގެ ދީނީ ދަލީލުތަކަށް ބުރަވެވަޑައިގެން، ދީނުގެ އަޞްލުތަކާ ޚިލާފުނުވާ ގޮތަށް، ބުއްދިފުޅުގެ ފުރިހަމަ ބޭނުންކުރައްވައިގެން ފަތުވާ ނެރުއްވި މާތް ދަންނަބޭކަލެއްކަމަށް މިޕާޓީން ފާހަގަކުރަމެވެ.

މިގޮތުން ދީނުގައި ހައްދުފަހަނަ އަޅައި ދިޔުމަކީ އިސްލާމް ދީނަށް ޢަދާވާތްތެރިވުންކަމަށާއި، ޖިހާދު ކުރުމުގެ ޙަޤީޤީ މާނައާއި ހައްދު ފަހަނައަޅާފައިވާ މީހުން ކުރާ ޖިހާދާ، އުޑާއި ބިމާހާ ތަފާތުކަމަށް މާތް މަރްޙޫމް ވިދާޅުވެފައިވާކަން މިޕާޓީން ފާހަގަ ކުރަމެވެ.
މާތް މަރްޙޫމްގެ ޙަޔާތްޕުޅުގެ ސީރަތުން އަޅުގަނޑުމެން ދިވެހީންނަށް ފިލާވަޅުތަކެއް ދަސްވުމުގެ ތައުފީޤު މާތް ރަސްކަލާނގެ ދެއްވުމަށް އެދި ދުޢާ ކުރަމެވެ. އަދި މާތް މަރްޙޫމަށް ސުވަރުގޭގެ ދާއިމީ ނިޢުމަތް ލައްވާށިއެވެ.
އާމީން.

ރިޔާސީ ނިޒާމަކަށް ފެތޭގޮތަށް ޕާޓީގެ އަސާސީ ގަވާއިދަށް ގެންނަން ބޭނުންވާ އިސްލާހްތައް ޕާޓީގެ އޮނިގަނޑަށް ގެނައުމަށް ދިވެހިރައްޔިތުންގެ ޑިމޮކްރެޓިކް ޕާޓީ (އެމްޑީޕީ)ން ނިންމައިފިއެވެ. އެމްޑީޕީން މިގޮތަށް ނިންމީ މިއަދު ބަނޑޮހުގައި ބޭއްވި އެމަޖިލީހުގެ ރިޓްރީޓަށް ވަޑައިގެންނެވި މެންބަރުންގެ އަޣްލަބިއްޔަތުންނެވެ.
އެމްޑީޕީގެ ގައުމީ މަޖިލީހުގެ މެންބަރެއްގެ ހައިސިއްޔަތުން ރާއްޖޭގެ އިއްޒަތްތެރި ރައީސުލް ޖުމްހޫރިއްޔާ މުހައްމަދު ނަޝީދު ވެސް ބައިވެރިވެ ވަޑައިގެންނެވި މި ބައްދަލުވުމުގައި އެމްޑީޕީގެ ކޮންގްރެސް އެޕާޓީގެ އަހަރީ ދުވަސް ކަމަށްވާ 26 ޖޫން 2010 ގައި ބޭޢްވުމަށާއި ޕާޓީގެ އެތެރޭގެ ޑިމޮކްރަސީ މިހާރަށް ވުރެވެސް ހަރުދަނާ ކުރުމުގެ ގޮތުން އަސާސީ ގަވާއިދަށް މުހިއްމު އިސްލާޙް ތަކެއް ގެނައުމަށް ގައުމީ މަޖިލީހުން ވަނީ ނިންމާފައެވެ.
އެމްޑީޕީގެ އިސް މަގާމްތަކަށް ބޮޑެތި ބަދަލު ތަކެއް ގެނައުމަށް ވެސް މިއަދުގެ ބައްދަލުވުމުގައި ނިންމާފައި ވެއެވެ. އެގޮތުން ޕާޓީގެ ރައީސް ކަމުގެ މަގާމާއި، ނައިބު ރައީސް ކަމުގެ މަގާމު އުވާލައި ޗެއަރޕާސަންގެ ދަށުން މަސައްކަތް ކުރައްވާނޭ ދެ ނައިބުން އިންތިޚާބުކުރާ ގޮތަށް ހަމަ ޖެއްސުމާއި، ޕާލަމެންޓްރީ ގްރޫޕްގެ ރައީސަށް ސިޔާސީ އިސް ދައުރެއްދޭ ގޮތަށް ގައުމީ މަޖިލީހުގެ އަޣްލަބިއްޔަތުން ވަނީ ފާސްކޮށްފައެވެ.
މީގެ އިތުރުން އިލެކްޝަންސް ކޮމިޝަނުން ކަނޑައަޅާފައިވާ އިންތިޚާބީ ދާއިރާ ތަކަށް ބަދަލެއް އަތުވެއްޖެ ނަމަ އަދި ޕްރޮވިންސް އުފެދުމުން ގައުމީ މަޖިލީހަށް ބަދަލު ގެނެސް ދާއިރާތަކުގެ ހިންގާ ކޮމިޓީތައް އަލުން އިންތިޚާބު ކުރުމަށްވެސް މިއަދުގެ ބައްދަލު ވުމުގައި ފާސްކޮށްފައި ވެއެވެ.
ދެން އަންނަ ރިޔާސީ ދައުރަކަށް ދިވެހި ރައްޔިތުންގެ ޑިމޮކްރަޓިކް ޕާޓީން ވާދަކުރައްވާ ކެންޑިޑޭޓް ވެސް ކަނޑައަޅާނީ ރިޔާސީ ޕްރައިމަރީއަކަށް ފަހު ކަމަށް އެޕާޓީން މިއަދު ވަނީ ނިންމާފައެވެ. މި ބަދަލުތަކާއި ގުޅިގެން ޕާޓީގެ އިންތިޚާބީ މަޤާމްތައް އަލުން އިންތިޚާބު ކުރެވޭނެއެވެ.
އެމްޑީޕީން މިހާރު ދަނީ އެޕާޓީގެ ކޮންގްރެސް އަށް ވާން ޖެހޭ ތައްޔާރީތައް ވަމުންނެވެ.

ދިވެހިރައްޔިތުންގެ ޑިމޮކްރެޓިކް ޕާޓީ (އެމްޑީޕީ)ގެ ޕާލަމެންޓްރީ ގްރޫޕްގެ ރައީސް މޫސާ މަނިކުގެ ނަންފުޅު ބޭނުންކޮށްގެން ރާއްޖޭގެ މީޑިއާ ޗެނަލަކުން ވިޔަފާރިކޮށްފައިވާތީ އޭގެ ބަދަލު ހޯދަން ބޭނުންފުޅުވާ ކަމުގައި އެމަނިކުފާނު ވިދާޅުވެއްޖެއެވެ. މޫސަ މިހެން ވިދާޅުވީ ރާއްޖޭގައި މިވަގުތު އޮތް އެންމެ މެންބަރުން ގިނަ ޕާޓީއަށް އެމްޑީޕީ ވުމުގެ އުފަލުގައި އެޕާޓީން އާޓިފިޝަލް ބީޗުގައި ރޭ ބޭއްވި ޚާއްޞަ ޖަލްސާ އެއް ގައި ވާހަކަފުޅު ދައްކަވަމުންނެވެ.
އެމްޑީޕީގެ މެންބަރުންނާއި އެޕާޓީއަށް ތާއީދުކުރައްވާ ގިނަ އަދަދެއްގެ ބަޔަކު ހާޒިރުވި މިޖަލްސާގައި މޫސަ ވިދާޅުވީ ބައެއް ވިޔަފާރި ވެރިންގެ މައްސަލައަކަށް ވެގެން އުޅެނީ އެވިޔަފާރިވެރިންނަށް ނުޙައްގުން ކަންތައްތަކަށް މަގުފަހި ކުރުމުގައި އެމްޑީޕީގެ ޕާލަމެންޓްރީ ގްރޫޕްގެ އެއްބާރުލުން ނުލިބުން ކަމުގައެވެ. އަދި މިސަރުކާރުން އެއްވެސް މީހެއްގެ ބޮލުގައި ދޮގު އިލްޒާމެއް ނާޅުވާނެ ކަމަށާއި، އެމަނިކުފާނުގެ ކާރު ޑްރައިވަރަށް ރިޝްވަތުދީގެން ބަޔަކު ވިޔަފާރީގެ ގޮތުގައި ބޭނުންކުރުމަށް ގެނެސް ނުވިކިފައި ހުރި ބަނގުރާތަކެއް އިޝްތިހާރުކުރުމަށް އެމަނިކުފާނުގެ ނަންފުޅު ބޭނުންކޮށްފައިވާ ކަމުގައެވެ.
” އަޅުގަނޑު މިރޭ އެމްޑީޕީގެ މެންބަރުންނާ ދިވެހިރާއްޖޭގެ ރައްޔިތުންގެ ކުރިމަތީގައި ދަންނަވާލަން ބޭނުންވަނީ މަސްތުވާތަކެތީގެ ވިޔަފާރިކޮށްގެން، އޭގެ ލާރި ހޯދައިގެން ޓީވީ ޗެނަލް ހަދައިގެން، ފިލްމުކުޅެގެން، ޑްރާމާ ދައްކާ މީހެއް ނޫނޭ އަޅުގަނޑަކީ.” މުސަ ވިދާޅުވިއެވެ. ” މީޑިއާ ހައްދު ފަހަނައަޅައިގެން ގޮސް އަޅުގަނޑުގެ ކާރާ، އަޅުގަނޑުގެ އަންހެނުންނާ، އަޅުގަނޑުގެ އާއިލާއާ، އަޅުގަނޑުގެ މުޅި ނަން ބޭނުންކޮށްގެން ރާއްޖޭގެ މީޑިއާ ޗެނަލަކުން ވިޔަފާރިކޮށްފިއޭ. އަޅޫގަނޑު ބޭނުން އޭގެ ބަދަލު ހޯދަން. ”
މޫސަ އިތުރަށް ވިދާޅުވީ ބޭންކުތަކާ ފައިސާ ރައްކާކޮށްފައި ބެހެއްޓޭ މާލީ އެހެންތަންތަން ހުންނައިރު، އާދައިގެ މީހަކު ދިރިއުޅޭ ގެއެއްގެ އެނދު ތަންދޮށުގައި 5 މިލިއަން ރުފިޔާ ރަބަރު ކޮތަޅަކަށް ލާފައި ބާއްވާފައި އޮތް އިރުވެސް އެކަށީގެންވާ ހެކި ނުލިބޭ ކަމަށް ބުނެ އެހިސާބުން އެފަދަ ބޮޑެތި މައްސަލަ ނިންމާލުން އެއީ ކަންބޮޑުވާން ޖެހޭ ކަމެއް ކަމުގައެވެ. އަދި އެމަނިކުފާނުގެ ކާރުކޮޅުން ފެނުނު ބަނގުރަލުގެ މައްސަލައިގައި ކަމާއިބެހޭ ފަރާތްތަކަށް އެމަނިކުފާނު ހާޒިރުކޮށްގެން ނަމަވެސް އެމައްސަލަ ތަޙްގީގުކޮށް އިންސާފުވެރި ޝަރީޢަތެއް ކުރުމަށް އެމަނިކުފާނު ވަނީ ރޭގެ ޖަލްސާގައި ގޮވާލައްވާފައެވެ.
ރޭގެ ޚާއްސަ ޖަލްސާގައި ރައީސުލް ޖުމްހޫރިއްޔާ މުހައްމަދު ނަޝީދު ވެސް ވާހަކަފުޅު ދެއްކެވިއެވެ. އެމަނިކުފާނު ދެއްކެވި ވާހަކަފުޅުގައި އެމްޑީޕީއަށް ” ނުވާނެއޭ، ނުކުރެވޭނެއޭ ބުނި ހުރިހާ ކަމެއް ” އެމްޑީޕީން ކުރަމުންދާ ކަމަށާއި، އެމްޑީޕީގެ މެނިފެސްޓޯގައިވާ ފަސް ވައުދުވެސް ފުއްދަވައި ދެއްވާނޭ ކަމުގައެވެ. އަދި މި ފަސްވައުދު ފުއްދުމަށް މިހާތަނަށް ކުރައްވާފައިވާ މަސައްކަތްތަކަށް ވެސް އެމަނިކުފާނުގެ ވާހަކަފުޅުގައި އަލިއަޅުވާލެއްވިއެވެ.
އެމްޑީޕީގެ ޕާލަމެންޓްރީ ގްރޫޕްގެ ބައެއް މެންބަރުންނާއި، ގައުމީ މަޖިލީހުގެ ބައެއް މެންބަރުން ވެސް ވާހަކަ ދެއްކެވި މިޖަލްސާ ނިމުނު ވަގުތު ޑީއާރުޕީ އޮފީސް ކުރިމަތީގައި މިޖަލްސާއަށް ހުރަސް އެޅުމުގެ ގޮތުން އަޑުގަދަކުރަމުން ދިޔަ ޑީއާރުޕީގެ ބަޔަކާއި، އެމްޑީޕީގެ ސަޕޯޓަރުންގެ މެދުގައި ކޮންމެވެސް ވަރަކަށް ހަމަނުޖެހުން ހިނގައި، އެވަގުތު އެސަރަހައްދުގައި ހަރަކާތްތެރި ވަމުންދިޔަ ފުލުހަކަށް އަނިޔާ ވެފައި ވެއެވެ.
ރާއްޖޭގައި މިވަގުތު އޮތް އެންމެ ބޮޑު ސިޔާސީ ޕާޓީގެ މަގާމް އެމްޑީޕީއަށް ލިބުނުކަން ރޭގެ ޖަލްސާގައި އިއުލާންކޮށްދެއްވީ އެމްޑީޕީގެ ސީނިއަރ ރެޖިސްޓްރާ ޖެނެރަލް އަހުމަދު ޝާހިދު (ސާބެ) އެވެ. އިލެކްޝަންސް ކޮމިޝަނުގައި އޮންނަ ސިޔާސީ ޕާޓީތަކުގެ ދަފްތަރުގައި މިހާތަނަށް ރަޖިސްޓްރީ ކުރެވިފައިވާ އެމްޑީޕީ މެންބަރުންގެ ސައްޙަ އަދަދަކީ 31،171 އެވެ. އަދި މީގެ އިތުރުން 2،000 އަށްވުރެ ގިނަ ފޯމު އިލެކްޝަނަށް މިހާރު ހުށަހަޅާފައިވާ ކަމަށް އެޕާޓީން މައުލޫމާތު ދެއެވެ.

އެމްޑީޕީ އިއްތިހާދުގެ ސަރުކާރުގެ މައިގަނޑު 5 ވަޢުދުގެ ތެރޭގައި ހިމެނޭ އެންމެ މުހިއްމު އެއް ވައުދު ކަމަށްވާ މަސްތުވާތަކެއްޗަށް ހުޅުވި ދޮރުތައް ބަންދުކުރުމަށް މި ސަރުކާރުން ކުރަމުންދާ މަސައްކަތްތަކަށް އަދުލު އިންސާފުގެ ދާއިރާއިން އެއްބާރުލުން ނުލިބޭތީ އެކަމާ ހިތާމަކޮށް މަސްތުވާތަކެތި ބޭނުންކޮށް އޭގެވިޔަފާރިކުރާ ފަރާތްތަކާއި ބޮޑެތި މާރާމާރީ ހިންގާ ފަރާތްތަކަށް މަގުފަހިވާ ގޮތަށް މިހާރަކަށް އައިސް ގިނަ މައްސަލަތަކެއް ނިމިގެންދާތީ އެކަން ދިވެހިރައްޔިތުންގެ ޑިމޮކްރެޓިކް ޕާޓީން އެންމެ ހަރުކަށި އިބާރާތުން ކުށްވެރިކުރަމެވެ.
ވޭތުވެދިޔަ ސަރުކާރުން ބަނގުރާ ގެންގުޅުމާއި ބުއިމުގެ ހުއްދަ 826 ފަރާތަކަށް ދީފައިވުމުގެ ސަބަބުން ރާއްޖޭގެ މީހުންދިރިއުޅޭ ރަށްރަށުގައި ބަނގުރާ އާންމުވެ، އޭގެ ސަބަބުން ބޮޑެތި ޖަރީމާތަކަށް މަގުފަހިވެ، ރާއްޖޭގެ އިޖުތިމާޢީ އަދާލަތު މިއަދު މިވަނީ ނެތިގޮސްފައެވެ. އަދި މިކަންތައް ހުއްޓުވުމަށްޓަކައި ރައްޔިތުންނާ ގާތުން ވެރިކަން ކުރަމުން އަންނަ އަދުގެ އޯގާތެރި ސަރުކާރުން މިގަވާއިދަށް އިޞްލާޙް ގެނެސް މީހުން ދިރިއުޅޭ ރަށްރަށުގައި ބަނގުރާ ވިއްކާ ފަރާތްތައް ޒިންމާދާރު ކުރުވުމަށް ކުރި މަސައްކަތް މިވަނީ އަލުން އަބުރާ ގެންގޮސްފައެވެ.
އަދާލަތު ޕާޓީ އާއި މަދަނީ ޖަމިއްޔާ ތަކާއި ގިނަ އަދަދެއްގެ ބައެއްގެ ދެކޮޅު ހެދުމުގެ ސަބަބުން، އެފާރާތްތަކުގެ އިލްތިމާސް ތަކަށް އިޖާބަދީ ދިވެހި ރައްޔިތުން އެދޭގޮތަށް އެގަވާއިދު އަލުން އަނބުރާ ގެންގޮސްފައިވުމުން ދޭހަކޮށްދެނީ އަދުގެ ސަރުކާރަކީ ހުރިހާ މާނައެއްގައި ވެސް ރައްޔިތުންގެ އަޑުއަހާ، ރައްޔިތުންގެ ވެރިކަމެއް ކުރަމުން އަންނަ ސަރުކާރެއް ކަމެވެ. އަދި އެކަމަށްޓަކައި އަދުގެ ސަރުކާރަށް މަރުހަބާ ދަންނަވަމެވެ.
ނަމަވެސް ރާއްޖޭގައި ފުޅާ ދާއިރާއެއްގައި މަސްތުވާތަކެތީގެ ވިޔަފާރި ކުރަމުންދާ ބައެއް ފަރާތްތަކާއިމެދު ޙުކުމް ކުރެއްވުމުގައި ފުލުހުންގެ ބުރަމަސައްކަތުން ހޯދާފައިވާ ފޮރެންސިކް އެތައް ހެއްކަކާ ދެކޮޅަށް ޙުކުމްކޮށް އަދުލު އިންސާފު ގާއިމްކުރުމުގައި އިހުމާލުވަމުންދާ ކަމީ މިޕާޓީން ނުހަނު ހިތާމަކުރާ ކަމެކެވެ. އެގޮތުން މިއަދު ނިމިގެން މިދިޔަ ގަޟިއްޔާ ނިމިގެންދިޔަ ގޮތާމެދު ވެސް މިޕާޓީން ނުހަނު ކަންބޮޑުވެއެވެ. އަދިހަމަ އެހެންމެ މަސްތުވާތަކެއްޗަށް ހުޅުވި ދޮރުތައް ބަންދުކުރުމަށް ސަރުކާރުން ކުރާ މަސައްކަތަށް ހުރަސް އެޅުމުގެ ނިޔަތުގައި އެފަދަ ފަރާތްތަކަށް ވަލުދޮރާށި ހުޅުވައިދިނުމަށް ރާއްޖޭގެ އަދުލު އިންސާފުގެ ދާއިރާއިން މަސައްކަތްކުރަމުން ދިޔުމަކީ ސަރުކާރުގެ ސިޔާސަތުތައް ތަންފީޒުކުރުމަށާއި، ހެޔޮވެރިކަމެއް ކުރުމަށް އެމްޑީޕީ އިއްތިހާދުގެ ސަރުކާރުން ކުރަމުންދާ މަސައްކަތްތަކަށް ގަސްދުގައި ހުރަސް އެޅުން ކަމުގައި މިޕާޓީން ދެކެމެވެ.
މީހުން ދިރިއުޅޭ ރަށްރަށުގައި ޣައިރު މުސްލިމުންނަށް ބަނގުރާ ވިއްކުމާ ދެކޮޅަށް ރާއްޖޭގައި ހަރަކާތްތެރިވާ ދީނީ ޖަމާޢަތްތަކާއި، މަދަނީ ޖަމިއްޔާތަކުން އުފުލި އަޑުތައް މަސްތުވާ ހިކިބާވަތްތައް ބޭނުންކޮށް އޭގެ ވިޔަފާރިކުރާ މީހުންނަށް ހިތްވަރުލިބޭ ފަދަ އަމަލުތައް ކުރާ ފަރާތްތަކާއި މެދު އުފުލުމުގައި އިޙްމާލުވެފައިވާކަން މިޕާޓީއިން ހިތާމަޔާއެކު ފާހަގަކުރަމެވެ. ރާއްޖޭގައި ހެދިފައިވާ ޤާނޫނުތައް ތަންފީޒުކުރުމުގައި އަދުލު އިންސާފުގެ ދާއިރާއިން ތަކުރާރުކޮށް އިޙްމާލުވަމުންދާތީ، އެފަރާތްތަކާ ދެކޮޅަށް އިހްތިޖާޖު ކުރުމަށް އަދާލަތު ޕާޓީއާއި، މަދަނީ ޖަމިއްޔާތަކާއި، ދިވެހި އެންމެހާ ލޮބުވެތި ރައްޔިތުންނަށް މިޕާޓީގެ ފަރާތުން އިލްތިމާސް ކުރަމެވެ. އަދި މިފަދަ މައްސަލަތައް ހައިކޯޓުގައި އިސްތިޢުނާފްކޮށްދެއްވައި، މިފަދަ މައްސަލަތަކުގައި އިންސާފްވެރި ފައިސަލާއަކާ ހަމައަށް ވާސިލުވުމަށް މަސައްކަތްކޮށްދެއްވައި މިމަސައްކަތްތައް ވިހާވެސް ހަލުވި މިނެއްގައި ގެންގޮސް ދެއްވުމަށް ދިވެހި ދައުލަތުގެ ޕްރޮސިކިއުޓަރ ޖެނެރަލްއަށް އިލްތިމާސްކުރަމެވެ.

ބަޔާން ނެރުނީ އެމްޑީޕީ ސެކްރެޓޭރިއެޓް

ދިވެހި ރައްޔިތުންގެ ޑިމޮކްރެޓިކް ޕާޓީ (އެމްޑީޕީ) ގެ ވަރަށް ޚާއްޞަ ޖަލްސާއެއް މިރޭ، 28 ފެބްރުއަރީ 2010 ވާ އާދީއްތަ ދުވަހުގެރޭ 9.00 ގައި އާޓިފިޝަލް ބީޗުގައި އޮންނާނެއެވެ. މި ޖަލްސާގައި ރާއްޖޭގެ އިއްޒަތްތެރި ރައީސުލްޖުމްހޫރިއްޔާ މުހައްމަދު ނަޝީދުވެސް ބައިވެރިވެ ވަޑައިގަންނަވާނެއެވެ.
މިޖަލްސާއަކީ ރާއްޖޭގައި މިވަގުތު އޮތް އެންމެ ބޮޑު ސިޔާސީ ޕާޓީއަށް އެމްޑީޕީ ވުމާއި ބައެއް މުހިއްމު އެހެންކާމިޔާބީތައް ފާހަގަކުރުމަށް ބާއްވާ ޖަލްސާ އެކެވެ.
ވީމާ މި ޚާއްސަ ޖަލްސާއަށް އެމްޑީޕީގެ ލޮބުވެތި މެންބަރުންނާއި ޕާޓީއަށް ހެޔޮއެދި ވަޑައިގަންނަވާ ވީހާވެސް ގިނަ ބަޔަކު ހާޒިރުވެވަޑައިގެން ދެއްވުމަކީ މިޕާޓީގެ ވަރަށް ބޮޑުއެދުމެކެވެ.

ރައްޔިތުންނާ ގާތުން ވެރިކަން ހިންގުމުގެ ޚިޔާލު ދިވެހިރައްޔިތުންގެ ހިތްތަކުގައި ނެތްނަމަ މިއަދު އެމްޑީޕީގެ ވެރިކަމެއް މިގައުމުގައި ނޯންނާނޭ ކަމުގައި އެމްޑީޕީގެ ޕާލަމެންޓްރީ ގްރޫޕްގެ މެންބަރު އަދި ފޭދޫ ދާއިރާގެ މެންބަރު އަލްއުސްތާޛް އަލްހާން ފަހުމީ ވިދާޅުވެއްޖެއެވެ. އަލްހާން މިހެން ވިދާޅުވީ ރ. އަލިފުށީގައި ހުކުރު ދުވަހުގެރޭ ބޭއްވި އެމްޑީޕީގެ ޚާއްޞަ ޖަލްސާގައި ޕްރޮވިންސް ހެދުމަށް ތާޢީދުކޮށް ވާހަކަފުޅު ދައްކަވަމުންނެވެ.
ރޭގެ ޖަލްސާގައި ވާހަކަދައްކަވަމުން އަލްހާން ވިދާޅުވީ ރައީސް ނަޝީދަކީ ވަރަށް ހިތްވަރުގަދަ، ވިސްނުންތޫނު ބޭފުޅެއް ކަމަށާއި، އެމަނިކުފާނުގެ ވިސްނުންފުޅު ހުންނަނީ އަންނަން އޮތް ޖީލިތަކުގެ މުސްތަގުބަލަށް ބައްޓަންކުރެވިފައި ކަމުގައެވެ. އަދި ރާއްޖޭގެ ޑިމޮކްރެޓިކް ހަޔާތުގައި ރައީސް ނަޝީދުގެ ދައުރުގެ މުހިއްމު ކަމުގެ ވާހަކަ އިދިކޮޅު ޑީއާރުޕީގެ މެންބަރެއްގެ ގޮތުގައި ހުންނެވި އިރުވެސް ގަބޫލުފުޅުކުރައްވާ ކަމުގައެވެ. އަދި އެމްޑީޕީގެ ސިޔާސަތަކީ ” ގައުމީ މުސްތަގުބަލަށް އޮތް ރައްކަލެއްކަން ވިސްނުނީ ރައީސް ނަޝީދު ސިވިލް ސާވިސްގެ މުޥައްޒަފުން މަދުކުރަން ނިންމުމާ، މުސާރަކުޑަކުރަން ނިންމުމާ، ކަރަންޓް ބިލުގެ އަގުތައް މައްޗަށް ޖައްސަން ފެށީ ހިސާބުން ” ކަމުގައި އަލްހާން ވިދާޅުވިއެވެ.
މިމޭރުމުން ވާހަކަފުޅު ދައްކަވަމުން އެމަނިކުފާނު އިތުރަށް ވިދާޅުވީ މިސަރުކާރާ ދޭތެރޭ އެމަނިކުފާނުގެ އުއްމީދު އާވެއްޖެ ކަމަށާއި، މިސަރުކާރުގެ މަގުޗާޓުގައި ހަގީގަތްތަކެއް އެބަހުރި ކަމަށެވެ. އަދި ރައީސް ނަޝީދުގެ އަނެއްދިވެހިރާއްޖޭގެ ތަޞައްވުރަކީ ހަގީގީ ތަޞައްވުރެއް ކަން ގަބޫލުފުޅުކުރައްވާ ކަން ހާމަކުރައްވަމުން އަލްހާން ވިދާޅުވީ ” ރައީސް ނަޝީދަކީ ރައްޔިތުންގެ ރުހުމާ ތާއީދު ވަގުތީ ގޮތުން ހޯއްދަވައިގެން ރައްޔިތުން ލައްވާ ފަރިހިކިޔުއްވައި ނަށަން ބޭނުންފުޅުވާ ބޭފުޅެއް ނަމަ އެގޮތަކަށް ކަންތައްތަކެއް ނުކުރެއްވީސް ” ކަމުގައެވެ.
މީގެ އިތުރުން އިތުރުން ސަރުކާރުން ބޭނުންތެރި އެތައް ބިލެއް މަޖިލީހަށް ހުށަހަޅާފައިވީ ނަމަވެސް އޭރު ދިވެހިރައްޔިތުންގެ ޕާޓީގެ މެޖޯރިޓީ އޮތް މަޖިލީހުން ރައްޔިތުންނަށް ފައިދާހުރި އެންމެ ބިލެއް ވެސް ހުށަނާޅާ ކަމަށާއި، ސަރުކާރު ޖަވާބުދާރީ ކުރުވުމުގެ ނަމުގައި ޑީއާރުޕީން ކުރިހާވެސް ކަމަކީ ސަރުކާރަށް އެއްބާރުލުން ދިނުމުގެ ބަދަލުގައި ސަރުކާރަށް ޖެއްސުންކޮށް އެމްޑީޕީ ސަރުކާރުގެ ވައުދުތައް ފުއްދިޔަ ނުދިނުމުގެ ސިޔާސަތެއް ގެންގުޅުން ކަމުގައި ވިދާޅުވެ ޑީއާރުޕީ އަށް އަލްހާން ފާޑުވިދާޅުވިއެވެ.
އަލްހާން ވިދާޅުވީ އެމަނިކުފާނު އިދިކޮޅު މެންބަރެއްގެ ގޮތުން ހުންނެވި އިރުވެސް ޕްރޮވިންސް ހެދުމުގެ ބިލަށް މައިގަނޑު ގޮތެއްގައި ތާޢީދު ކުރެއްވި ކަމަށާއި، ޕްރޮވިންސް އުފައްދައިގެން ރާއްޖޭގެ އިދާރީ ދާއިރާތައް ލާމަރުކަޒީ އިސޫލުން ހިންގައިގެން މެނުވީ އަޅުގަނޑުމެން މިއެދޭ ތަރައްގީ ހާސިލް ނުކުރެވޭނޭ ކަމުގައެވެ.
” އަޅުގަނޑު އެއްވެސް އިރަކު ނުބުނަން ޕްރޮވިންސް ހެދުމަކީ ގާނޫނު އަސާސީއާ ޚިލާފް ކަމެކޭ. އަޅުގަނޑު ދަންނަވާނީ ދިވެހިރާއްޖޭގައި ތިއްބެވި ހުރިހާ ލޯޔަރުން އެއްކޮޅަކަށް އެރުއްވި ނަމަވެސް އަޅުގަނޑު ސާބިތު ކޮށްދޭނަން ޕްރޮވިންސް ހެދުމަކީ ގާނޫނު އަސާސީއާ ޚިލާފު ކަމެއް ނޫންކަން. ” އަލިފުށީގެ އެމްޑީޕީ ސަޕޯޓަރުންނާއި ކައިރި ރަށްރަށުން ވަޑައިގެން ތިއްބެވި އެމްޑީޕީގެ އެތައް ސަޕޯޓަރުންނާ މުޚާޠަބުކުރައްވައި އަލްހާން ވިދާޅުވިއެވެ.
މިޖަލްސާގައި އެމްޑީޕީގެ ސެކްރެޓަރީ ޖެނެރަލް ހަސަން ޝާހު ދެއްކެވި ވާހަކަފުޅު މައިގަނޑު ގޮތެއްގައި ބިނާކުރެއްވީ މިވަގުތު ދިވެހިރާއްޖޭގައި އޮތް އެންމެ ބޮޑު ސިޔާސީ ޕާޓީއަށް އެމްޑީޕީ ވުމާއި އެމްޑީޕީގެ މެންބަރޝިޕްގެ ކަންތައްތަކާއި، ގޮފިތަކުގެ ރައީސުންނަށް ވުމުން ލިބޭ ފައިދާތަކުގެ މައްޗަށެވެ.
އަލިފުށީގައި ފުރަތަމަ ފަހަޜަށް މިބޭއްވި އެމްޑީޕީގެ ޚާއްސަ ޖަލްސާގައި އެޕާޓީގެ ޕާލަމެންޓްރީ ގްރޫޕްގެ ބައެއް އެހެން މެންބަރުންވެސް ވާހަކަފުޅު ދެއްކެވިއެވެ. އެގޮތުން ބާރަށު ޑާއިރާގެ މެންބަރު މުހައްމަދު ޝިފާޒް އާއި މަނަދޫ ދާއިރާގެ މެންބަރު މުހައްމަދު ޠޯރިގުގެ އިތުރުން ފުވައްމުލަކު މެދު ދާއިރާގެ މެންބަރު ޝިފާޤް މުފީދު ވެސް ވަރަށް އަގުހުރި ވާހަކަފުޅުތަކެއް ދެއްކެވިއެވެ.
ރޭގެ ކުލަގަދަ ހަފްލާގައި ރ. އަތޮޅުގެ ރަށްރަށުގެ 4 ކަތީބަކާއި، ބައެއް ރަށްރަށުގެ ޑީއާރުޕީގެ ގޮފީގެ ރައީސުންނާއި އިސް ހަރަކާތްތެރިންގެ ތެރެއިން ގިނަ އަދަދެއްގެ ބަޔަކު އެމްޑީޕީއާ ގުޅިވަޑައިގެންނެވިއެވެ. މިޖަލްސާއަށް ޓަކައި އަލިފުށި ވަނީ ވަރަށް ބޮޑަށް ޒީނަތްތެރިކޮށްފައެވެ. އަދި އެމްޑީޕީގެ ވަފްދަށް އެރަށުން ކިޔާފައިވަނީ ވަރަށް ހޫނު މަރުހަބާއެކެވެ.
އެމްޑީޕީން ހާމަކޮށްފައިވާ ގޮތުން އާބާދީގެނިޞްބަތުން މުޅިރާއްޖެއިން ވެސް އެމްޑީޕީގެ މެންބަރުން އެންމެ ގިނަ އަތޮޅަކީ ރ. އަތޮޅެވެ. ކުރިން އެންމެ 400 މެންބަރުން ރ. އަތޮޅުގައި ތިބި ނަމަވެސް މިހާރު އެއަދަދު ވަނީ 1200 އަށް އަރާފައެވެ. އަދި ރ. އަތޮޅުގެ 600 އެއްހާ ފޯމު މިހާރުވެސް އިލެކްޝަނަށް ފޮނުވާފައިވާ ކަމަށް އެޕާޓީން ބުނެއެވެ.