ރައީސް ނަޝީދު ކެނެރީގޭގައި މީޑިއާ އަށް ދެއްވި އިންޓަވިއުއެއްގައި ވިދާޅުވީ މަގުމަތިން މިހާރުގެ ބާޣީ ސަރުކާރު ވައްޓާލައްވަން ބޭނުންފުޅުނުވާ ކަމަށާއި، ބޭނުންފުޅުވަނީ އިންތިޚާބެއް ކަމަށެވެ. އަދި މިހާރު އިންތިޚާބެއް ބޭއްވި ނަމަވެސް އެ އިންތިޚާބު ކާމިޔާބުކުރައްވައި، އަލުން ވެރިކަމަށް ވަޑައިގެންނެވޭނޭ ކަމުގެ ފުރިހަމަ ޔަޤީންކަން އެބައޮތް ކަމަށް ރައީސް ވިދާޅުވިއެވެ. އަދި މަގުމަތިން ވެރިކަން ވައްޓާލަން ބޭނުން ނަމަ އިއްޔެ އެކަން ކުރެވުނީސް ކަމަށް ރައީސް ވިދާޅުވިއެވެ.

ރައީސް ނަޝީދު ލައްވައި އިސްތިއުފާގެ ސިޓީ ލިއުއްވީ މަޖުބޫރުކޮށްގެން ކަމަށާއި ސިޓީ ލިއުއްވީ ޑިފެންސް މިނިސްޓްރީގައި ހުންނަވައިގެން ކަމަށާއި، އެހެން ނަމަވެސް އެ ސިޓީ ރައްޔިތުންގެ މަޖިލީހަށް ފޮނުއްވާފައި ނުވާނެ ކަމަށް ރައީސް ވިދާޅުވިއެވެ. އަދި އިސްތިއުފާގެ ސިޓީ ލިޔުއްވުމަށް ފަހު އެ މަނިކުފާނުގެ ލީގަލް ސެކްރެޓަރީއާ ހަވާލުކުރެއްވުމުން، މަޖުބޫރުކުރި މީހުން ލީގަލް ސެކްރެޓަރީ އަތުން ސިޓީ އަތުލީ ކަމަށާއި އެހެންކަމުން އެ ސިޓީ މަޖިލީހަށް ފޮނުއްވީ އެ މަނިކުފާނުގެ ފަރާތުން ނޫން ކަމަށް ވެސް ރައީސް ނަޝީދު ވިދާޅުވިއެވެ.

ޑިފެންސް މިނިސްޓަރ ތޮލްޙަތު އިބްރާހީމް ކަލޭފާނު ވެސް ރައީސް ނަޝީދުގެ އަރިހުގައި ކެނެރީގޭގައި އެބައިންނެވިއެވެ. ތޮލްހަތު މީޑިއާއަށް ވިދާޅުވީ އެންމެ ބިރުފުޅުގަތީ ސަރުކާރާ ދެކޮޅަށް ނުކުތް ސިފައިން ހަތިޔާރު ހިފައިގެން އައިސް ރައީސަށް ކަމެއް ކޮށްފާނެތީ ކަމަށެވެ. އަދި ސިފައިންނާއި ފުލުހުންގެ އޮފިސަރުންނަށް ފައިސާ ބެހިކަމުގެ މަޢުލޫމާތު ވެސް ލިބިވަޑައިގެންފައިވާ ކަމަށް ތޮލްހަތު ވިދާޅުވިއެވެ.

މިހާރުގެ ބާޣީ ސަރުކާރުން ޕޮލިސް ކޮމިޝަނަރަކަށް އައްޔަންކުރައްވާފައިވާ ޢަބްދުﷲ ރިޔާޒް އާއި ހަވާލާދެއްވައި ތޮލްހަތު ވިދާޅުވީ އެމަނިކުފާނާއި ރައީސް ނަޝީދު ހައްޔަރުކުރައްވަން ކްރިމިނަލް ކޯޓުން ކޮށްފައިވާ އަމުރު ތަންފީޒްނުކުރައްވާނޭ ކަމަށެވެ.

ޔޫރަޕިއަން ޔޫނިއަން (އީޔޫ) އަދި އިނގިރޭސި ވިލާތަށް ކަނޑައަޅުއްވާ އެމްޑީޕީގެ ސްޕޯކްސް ޕާސަން ކަމުގެ މަގާމަށް ޑރ.ފަރަހަނާޒް ފައިސަލް ހަމަޖައްސަވައިފިއެވެ.

އެކަމަނާ މިހާތަނަށް ހުންނެވީ އިނގިރޭސި ވިލާތާއި އީޔޫއަށް ކަނޑައަޅުއްވާފައި ހުންނަވާ ސަފީރެއްގެ ގޮތުގައެވެ. ނަމަވެސް ރައީސުލް ޖުމްހޫރިއްޔާ މުޙަންމަދު ނަޝީދަށް ބަޑިން އިންޒާރުދީ، ބަޤާވާތަކުން ސަރުކާރު ބަދަލުކުރުމާއި ގުޅިގެން އެކަމަނާ ވަނީ އިއްޔެ މަގާމުން އިސްތިޢުފާދެއްވާފައެވެ.

މި މުޒާހަރާގައި 8000 އާ ގާތްކުރާ ޢަދަދަކަށް މީހުން ބައިވެރިވި.

އަނިޔާވި ފަރާތްތައް ވެސް ފުލުހުންގެ އެމްބިއުލާންސަށް އަރުވާފައިވަނީ ބިންމަތީގައި ދަމާފައި.

އެމްޑީޕީގެ ޗެއަރޕާސަން މޫސާ މަނިކު އޮންނެވީ އައިގީއެމްއެޗްގެ އައިސީޔޫގައި

ފޮޓޯ:އަނދާ

ހަށިކޮޅުގައި އެންމެ ލޭ ތިއްކެއް ހުއްޓަސް ދިވެހިރާއްޖޭގެ ޤާނޫނީ ވެރިކަން އެހެން ވެއްޓިފައި އޮތަ ނުދެއްވާނޭ ކަމަށް ރައީސް މުޙަންމަދު ނަޝީދު ވިދާޅުވެއްޖެއެވެ.

އެމްޑީޕީން މިއަދު މެންދުރުފަހު ދަރުބާރުގޭ ދޮށިމޭނާ މާލަމުގައި ބޭއްވި އެ ޕާޓީގެ ގައުމީ މަޖިލީހުގެ ކުއްލި ބައްދަލުވުމެއްގައި ވާހަކަފުޅުދައްކަވަމުން ރައީސް ނަޝީދު ވަނީ އިސްތިއުފާދެއްވީ މަޖުބޫރު ވެގެން ކަމަށެވެ. އަދި ރައީސް ކަމުގެ ގޮނޑީގައި މިހާރު އިންނެވި ރައީސް ނަޝީދުގެ ރަނިންގމޭޓް ޑރ.މުޙަންމަދު ވަޙީދު ޙަސަން މަނިކަށް، “އެގޮނޑިން ފޭބުމަށް” ރައީސް ނަޝީދު ގޮވާލެއްވިއެވެ. އަދި އިއްޔެގެ ބަޣާވާތުގައި ބައިވެރިވި ފަރާތްތައް އިންސާފުގެ ކުރިމައްޗަށް ގެނައުމަށް އުއްތަމަ ފަނޑިޔާރު އަލްއުސްތާޛް އަޙުމަދު ފާއިޒް ޙުސައިން އަށް ރައީސް ނަޝީދު ގޮވާލެއްވިއެވެ.

“އަޅުގަނޑުގެ ގައިގައި އެންމެ ލޭތިއްކެއް ހުއްޓަސް ޤާނޫނީ ވެރިކަން ވެއްޓިޔަ އެހެން އޮތަކަ ނުދޭނަން.” ރައީސް ނަޝީދު ވިދާޅުވިއެވެ.

އަލުން އަނބުރާ މިރާއްޖޭގައި ހެޔޮވެރިކަން ޤާއިމްކޮށްދެއްވާނޭ ކަމަށާއި، ” އެކެއް އަނެކެއްގެ ކިބައިން ހިއްވަރު ލިބިގަނެ ބިރު ފަހަނައަޅައިދާނޭ” ކަމަށާއި އަދި މީގެ އިތުރުން ރާއްޖޭގައި ހަމައާއި އިންސާފް ގާއިމްކޮށްދެއްވުމަށް ” ސަރުކާރު ހިސާރުކޮށްގެން ތިބި ފަރާތްތަކަށް ރައީސް ނަޝީދު ގޮވާލެއްވިއެވެ.

މިއަދުގެ ގައުމީ މަޖިލީހުގެ ޖަލްސާ ގައި މިހާރުގެ ސަރުކާރު ހިންގަމުންދަނީ އިންޤިލާބީ ފުލުހުންކަމަށާއި، އެމީހުންގެ ފަހަތުގައި ވަނީ ދިވެހިރާއްޖޭގައި 30 އަހަރުގެ
ޚުދުމުޚްތާރު އަނިޔާވެރި ވެރިކަމެއްކުރި މީހުންކަމަށް ވުމާއެކު، މި ޣައިރުޤާނޫނީ ސަރުކާރު ޤަބޫލުނުކުރުމަށް ދިވެހި ރައްޔިތުންނަށް އިލްތިމާސްކޮށް، މި ސަރުކާރު ވެރިކަމުން ބޭލުމަށް ދިވެހި ރައްޔިތުންނާއެކު މިޕާޓީގެ މެންބަރުން ހިތްވަރާއެކު ނިކުތުމަށް ގޮވާލައި، އެ ގޮތަށް ޢަމަލުކުރުމަށް އެމްޑީޕީގެ ޤައުމީ މަޖިލީހުން ވަނީ އިޤްރާރުވެފައެވެ.

މީގެ އިތުރުން ރާއްޖޭގެ ޢަދުލު އިންސާފްގެ ދާއިރާ މިނިވަން ކުރުމަށް އެމްޑީޕީން ބާއްވަން ހަމަޖައްސާފައިވާ ބޮޑު މުޒާހަރާ “އިންސާފުގެ ދަތުރު” ހަމަ އެ ތާރީޚްގައި ބާއްވާނޭ ކަމަށާއި، ޤާނޫނާއި ހިލާފަށް ފުލުހުންނާއި ސިފައިންގެ މަދު ބަޔަކު އިދިކޮޅު ސިޔާސީ ޕާޓީތަކާއި ގުޅިގެން މިރާއްޖޭގެ ވެރިކަން ޣައިރު ޤާނޫނީކޮށް، ނައިބު ރައީސް މުހައްމަދު ވަހީދު ހަސަން މަނިކު މިރާއްޖޭގެ ރައީސުލްޖުމްހޫރިއްޔާ ކަމަށް ހަމަޖެއްސުމާއި ގުޅިގެން މިޕާޓީން އަމަލުކުރަންވީ ގޮތްތައް ތަންފީޒުކުރުމަށްޓަކައި 11 މެމްބަރުންގެ ކޮމެޓީއެއް އެކުލަވާލުމަށް ވެސް މިއަދު ބޭއްވި އެމްޑީޕީގެ ގައުމީ މަޖިލީހުގެ ޖަލްސާގައި ވަނީ ފާސްކޮށްފައެވެ.

ކުރީގެ ހޮލިޑޭއިން ގައި ބޭއްވި އެމްޑީޕީގެ ގައުމީ މަޖިލީހުގެ 83 ވަނަ ޖަލްސާގެ ތެރެއިން .. މިއަދުގެ ޖަލްސާ އޮންނާނީ ދަރުބާރުގޭ ދޮށިމޭނާ މާލަމުގައި

އެމްޑީޕީގެ ގައުމީ މަޖިލީހުގެ ކުއްލި ބައްދަލުވުމެއް މިއަދު އޮންނާނެއެވެ.

މި ބައްދަލުވުން އޮންނާނީ މިއަދު މެންދުރުފަހު 2.00 ގައި ދަރުބާރުގޭ ދޮށިމޭނާ މާލަމްގައެވެ.

މިއަދުގެ ބައްދަލުވުމަކީ އެމްޑީޕީގެ ގައުމީ މަޖިލީހުގެ 100 ވަނަ ބައްދަލުވުމެވެ.

ނެދަރލެންޑްސް ސަރުކާރުން ރާއްޖެއަށް ކަނޑައެޅުއްވި އާ ސަފީރު ލުޑޮވިކަސް ވިލްހެލްމަސް މަރިއަރ ޕިއެޓް، އެމަނިކުފާނުގެ ސަފީރު ކަމުގެ ފަތްކޮޅު ރައީސުލްޖުމްހޫރިއްޔާ މުޙަންމަދު ނަޝީދަށް މިއަދު އަރުއްވައިފިއެވެ.

މިއަދު މެންދުރުފަހު ރައީސުލްޖުމްހޫރިއްޔާގެ އޮފީހުގައި ބޭއްވެވި މިރަސްމިއްޔާތުގައި، ފަތްކޮޅު އެރުއްވުމަށްފަހު، ނެދަރލެންޑްސްގެ އާ ސަފީރާ ރައީސުލްޖުމްހޫރިއްޔާ ބައްދަލުކުރައްވައި، ސަފީރަށް ތަހުނިޔާ ވިދާޅުވިއެވެ. އަދި ރާއްޖެއާއި ނެދަރލެންޑްސްއާ ދެމެދު އޮތް ގުޅުމާއި، މިގުޅުން އިތުރަށް ބަދަހިކުރެއްވުމާ ބެހޭގޮތުން ދެބޭފުޅުން ވާހަކަފުޅު ދެއްކެވިއެވެ.

މި ބައްދަލުކުރެއްވުމުގައި ރާއްޖޭގެ މިހާރުގެ ސިޔާސީ މަސްރަޙާ ބެހޭގޮތުންނާއި، ރާއްޖޭގެ އިޤްތިޞާދު އިތުރަށް ހަރުދަނާކުރެއްވުމަށް ސަރުކާރުން އަޅުއްވަމުން ގެންދަވާ ފިޔަވަޅުތަކުގެ މައްޗަށް ދެބޭފުޅުން މަޝްވަރާ ކުރެއްވިއެވެ. މިގޮތުން ރާއްޖޭގެ އިޤްތިޞާދަށް ކުރިމަތިވެފައިވާ މައްސަލަތައް ޙައްލުކުރެއްވުމުގެ ގޮތުން ސަރުކާރުން އަލަށް ހިންގަވަން ފެށްޓެވި ޓެކްސް ނެގުމުގެ ނިޒާމް ވަރަށް ކާމިޔާބުކަން ރައީސުލްޖުމްހޫރިއްޔާގެ ވާހަކަފުޅުގައި ފާހަގަކުރެއްވިއެވެ.

ފައިސާވެރިންނާ ނުފޫޒުގަދަ ފަރާތްތަކުގެ ބާރުގެ ދަށުވެފައިވާ ރާއްޖޭގެ ޖުޑިޝަރީ މިނިވަންވެ ރައްޔިތުންގެ މެދުގައި ހަމަ ހަމަ ކަމާ އެކު އިންޞާފް ގާއިމްވެގެން ދިއުމަކީ މުޅި ދިވެހި އުންމަތް އެކަމަކަށްޓަކާ ޒަމާނުއްސު ރޮއި އާދޭސް ކުރި އަދި އެކަން ކޮށްދޭނޭ މުޞްލިޙަކަށް ބޭނުންވެފައިވާ ކަމެކެވެ.

ދިވެހި ޖައްވުން އުދަވި މިއަދުގެ އިޞްލާހުގެ ބާނީ ގ.ކެނެރީގޭ މުޙައްމަދު ނަޝީދު ގައުމުގެ އެންމެ މަތީ ވެރިކަމަށް ﷲ ކަނޑައެޅުއްވުމުން ދިވެހިންގެ ހިތްތަކުން އާހެއްގެ އަޑު އިވިގެން ދިޔައެވެ.

ގަދަފަދަ ޠޫފާނަކުން ސަލާމަތްވުމުން ކުރާނޭ އުފާ ދިވެހިން ހިތްތަކަށް ލިބި މޯޅިއަކަށް ދެމިނުލާ ހަމަ އެކަކުނެތޭވެސް ބުނެވިދާނެއެވެ. އަޅުވެތިކަމާ ބިރުވެރިކަމާ ނާމާންކަމުގެ އަދިރިކަމުގެ ޙަޔާތަކުން އުފާވެރިކަމާ މިނިވަން ކަމާ ތަނަވަސް ކަމާ ދުޅަހެޔޮކަމާ އޯގާވެރިކަމުގެ ޙަޔާތަކަށް އިރު އުދަރެހުން ފާއްދާލައިފިއެވެ. ﷲގެ ހެޔޮރަޙުމަތް ދިވެހިންގެ މައްޗަށް މިންވަރު ކުރައްވައިފިއެވެ.

ވެރިކަން ގެއްލި އެކަމުގެ ސަބަބުން ހިތާމަކުރަމުންދާ ޢާއިލާތަކާ ވެރިކަން ކުރެއްވި ބޭފުޅުންގެ ވެރިކަމުގެ ބާރާނުފޫޒާ ފައިސާ ވެރިކަމާ އިއްޒަތް ގެއްލި ވެރިކަމުގެ ތެރޭގައި ރައްޔިތުންނަށް ދެމުންގެ ގެންދިޔަ އަނިޔާތަކާ ކޮށްފައި ހުރި ވައްކަމާ ޚިޔާނާތްތަކުގެ ސަބަބުން ގައުމުވަނީ އިގްތިޞާދީ ގޮތުން ދަށު ދަރަޖައެއްގައެވެ.

ރައްޔިތުންގެ މުދަލާ ފައިސާ އަކީ ވެރިކަން ކުރަންތިބި ބައެއްގެ އަމިއްލަ ތަރިކަ ކަމުގައި ބަޔަކަށް ގަބޫލު ކުރެވި ވެރިމީހާގެ ހައިބަތާ ގަދަރު ދެމެހެއްޓުމަށްޓަކާ ދައުލަތުގެ މުޅި ބައިތުލް މާލުން ހޭދަކުރަމުން ދިޔަ ފިރުޢައުނީ ވެރިކަން
ނިމިގެންދިޔަ ނަމަވެސް މިގައުމުގައި ކަލެއްގެ ޢިއްޒަތް ބޭނުންވެގެން ފިރުޢައުނުގެ ގާނޫނު ތަންފީޒު ކުރަމުން ގެންދިޔަ ކުރީގެ ރައީސުލް ޖުމްހޫރިއްޔާގެ ވެރިކަމުގައި ގާނޫނު އަސާސީ ބަދަލުކޮށް ދައުލަތުގެ ހުރިހާބާރުތައް އެއްކޮށް އަންބޮނޑިޔަށް ކަހާލުމުގެ ނަތީޖާ މިއަދު މިފެންނަނީ މާލޭގެ މަގުމަތިންނެވެ.

ރައްބިއެއް ރަސޫލެއް ވަކިކުރަން ނުވެސް ދަންނަބަޔަކަށް ފަނޑިޔާރުކަން ދީ ކުރީގެ ރައީސް އޮފީހުން ފޮނުވާ ޙުކުމްތައް އިއްވާލުމަށް މައުމޫނު އައްޔަނު ކޮށްފައި ތިބި ދަށުދަރަޖައިގެ ފަނޑިޔާރުން މުޅި ފަނޑިޔާރުގެ ޚިޞާރު ކޮށްފައިވަނީ މައުމޫނާ އެފަރާތްތަކާ މެދުގައި ހަދާފައިވާ ޑީލެއްގެ ދަށުން ކަމަށް ގިނަބަޔަކު އެދަނީ ގޮވަމުންނެވެ.

ވެރިކަމުގެ ޢާއިލާއަށް ނިސްބަތް ވާ ހަމަ އެކެއްގެ ޝަރީޢަތެއް ވެސް މިޝަރުޢީ ނިޒާމުގެ ތެރެއިން ނުބެލޭނޭ ގޮތަށް މުޅިނިޒާމުވަނީ ތަޅު އަޅުވާފައެވެ. އެމްޑީޕީ ވެރިކަމަށް އައީ ނުވަތަ ވެރިކަމަށް ގެނެވުނީ މިގައުމުގައި ޢަދުލު އިންޞާފް ނެތިގެން ރައްޔިތުންގެ ޖާނާ މާލުން ގުރުބާންވެގެންނެވެ.

މިއަދު ސަރުކާރުން ކުރަން މިއުޅޭކަމަކީ އެދުވަހު ރައްޔިތުން އެދުނު ފަދަ މިނިވަން އިންޞާފް ވެރި ފަނޑިޔާރުގެއެއް ރައްޔިތުންގެ އަތުޖައްސައި ދިނުމުގެ މަސައްކަތެވެ. ރައްޔިތު މީހާގެ އެދުމަކީ ޢަދުލުވެރި އިންޞާފް ވެރި ފަނޑިޔާރުގެއެއް ލިބި އެ ފަނޑިޔާރުގެއަކީ ވަކި ކުލައަކަށް ނުބަލާ ދެރަމޮޅު ބެލުމެއްނެތި އެންމެންނަށް ހަމަ ހަމަކަމާއެކު އިންޞާފް ލިބޭތަނަކަށް ވެގެން ދިއުމެވެ. ރައްޔިތުން މިކަން ކުރަން ޙަވާލުކުރި ފަރާތަކީ މި ގައުމުގެ އެންމެ މަތީވެރިޔާ ރައީސުލް ޖުމްހޫރިއްޔާ ކަމަށް ވީހިނދު އެމަނިކުފާނުގެ މައްޗަށް ފަރުޟުވެގެން ވަނީ މިގައުމުގެ ޢަދުލު އިންޞާފްގެ ދާއިރާ ﷲގެ ފޮތާ ރަސޫލާގެ ސުންނަތުގައިވާ ގޮތަށް ބައްޓަން ކުރުމަށެވެ.

އެހެންކަމާއެކު އެމްޑީޕީގެ އިންޞާފްގެ ދަތުރު ނިންމާލުމަށް ގަސްދު ކޮށްފައިވަނީ ބޮޑު ރަސް މިއްޔާތަކަށް ފަހު ރައްޔިތުން އެދިފައިވާފަދައިން ފަނޑިޔާރުގެ ގާއިމް ކޮށްދިނުމަށްފަހުގައެވެ.

މިގައުމަށް ބަޔަކު އިސްލާހީ ބަދަލުތަކެއް ގެނައުމަށް ނުކުތުމުން އެއްކަލަ މައިކަށި ބިންދާ ކަލޭގެ ނުކުމެ އެމީހުންގެ ފަސްފަހަތުން ހިނގާންފެށީ މާސޯލިހު މީހެއް ކަމުގައި ދަށްކައިގެންނެވެ. އެކަމަކު އޭނާގެ އެހުންނަ ވިޔަރި ގަދަކަމަކާއި ތާކުންތާކު ނުޖެހޭ ވިސްނުމުގެ ސަބަބުން އަބަދުވެސް އޭނާއަށް ޖެހުނީ އެއިރުވެސް އެކަހެރިވެގެން އުޅޭށެވެ.

ދެހާސް އަށްވަނަ އަހަރުގެ ރިޔާސީ އިންތިޚާބާ ކައިރިވެގެން އައިއިރު ވެރިކަމަށް މީހުން ކުރިމަތިލާން ފެށުމުން ކޮންމެވެސް މީހަކު މިކަލޭގެ ގާތު ” ކަލޭވެސް ނިކަން ކުރިމަތި ލާބަލާށޭ ، ހޮވިދާނެކަން ނޭނގޭ ނޫންހޭ ” ބުނުމުން މީނާވެސް ކުރިމަތިލިއެވެ. ވީވަރަކީ ފޯއްވަޅި ގެއްލި ފޯއްކިބަ ގެއްލި ފޯއްއެޅި ތަބައްވެސް ވީނުވީތަނެއް ނޭނގި ގެއްލުނީއެވެ. އިލެކްޝަންއަށް ދެއްކި ލާރިކޮޅުވެސް ނުލިބި ހަފުސްވީއެވެ. މިކަމާ ރުޅިއެރީ އިސްލާހީ މަސައްކަތުގައި އުޅުނު މީހުންދެކެއެވެ. އަދި ހީކުރީ ކުރީގެ މުސްކުޅި ކެޔޮޅު ކަލޭގެއަށް އަދިވެސް ވެރިކަން ލިބޭނެ ކަމަށެވެ. މިހެން ހިތައި ޅޮސްއުނދޯލީގައި މިކަލޭގެ އިންދައި ބިންދައިގެން އިނދަ ޖެހުމުން އަނެއްކާވެސް ” އާނދޮގޭއޭ ” ބުނެ ތެދުވެ ފިނދު މަސްގަނޑުގައި ހުރިވެލި ފޮޅާލައިގެން ދެންނުކުތީ ރައްޔިތުންގެ މަޖީލުގެ ގޮނޑިއެއް ލިބޭތޯއެވެ. އަވަށްޓެރި ކުދިންކޮޅާ ވާދަކޮށް އެންމެ ފަހަތު ސަފުންވެސް ޖާގަނުލިބުނެވެ. ކުރީގައި މާމޮޅަކަށް ވަށިގަނޑު ބޯޅަ ކުޅެވުނޭ ހީކޮށް ފުމެފުމެ ހަލާކުވީއިރުވެސް ކުރީސަފުގައި ތިބިމީހުން ކުރާނުކުރާ ކަމެއް ނޭނގުނެވެ. އެންމެފަހުން ދެމީދާފަހި ބުޅަލަށް ވީވަރުވެ ދިޔައީއެވެ.

މިފަހަރު ރުޅިގަނޑު ބާލާލީ އަމިއްލަ ޕާޓޭން ކަމުގައި ބަލައިގެން އުޅުނު މީހުންނަށެވެ. ކުޑައޮޑި ފައްތާލައި ބޮޑުއޮޑިޔަށް އަރަނީއޭ ގޮވައި ފަންރިޔާނެގި ބާއޮޑިއަކަށް އަރައި ތެޅިފޮޅިގަތް ބޮނޑީގައި އެއޮޑި ފެންކަށްވާލައި ދެންމެ ދެންމެ ބަންޑުން ޖަހާލަފާނެހެން ހީވުމުން އެއޮޑި ދޫކޮށް ދުވަހަކު ރުކެއްގައި ނުހުންނަ ކުލައެއް ކަމުގައިވާ އަސުރުމަލު ކުލައިގައި ފާޑެއްގެ ބައްޔެއް ޖެހި ސަލާމަތް ނުވެފައިހުރި ރުކެއްގެ ކުރިއަށް އަރައި ފައްލަންބެހެން ވެޑުވިގެންފިއެވެ. ނަސީބަކުން ކުރީގައި ސަލާމަތުން ހުރިއިރު އެރުކުގައި ނުކުމެފައިވާ މަތިވަރު މުޅީން ހުސްނުވެ ހުރީތީވެ ދެންވާ މަރުވަންދެންވެސް ބޮންތީގައި ބައްދާލައިގެން އޮންނާނެ ކަމުގައި ހުވާކޮށްގެން އެއޮތީއެވެ.

މިހެން އޮންނައިރު ރުށްދަށުން އެހިނގާ މީހުންގެ އަބުއިކަމާ ކުޅަދާނަކަން ފެނި ހިތައް އެއަރާ އެއްޗެތީގެ ގިނަކަމުން ހިތްދަތިވެ މިކަލޭގެ އެއްދުވަހުން އަނެއް ދުވަހަށް އަންނަނީ މޮޔަވަމުންނެވެ. ރުކުގެ ފަންކޮޅުގެ ޟަޢީފުކަމާއިހުރެ މެންދުރު ގަޑީގައި ވާހޫނުން ތަލަފިހުނެއް ކަމަކު ދެން އެރުކުން ފައިބައިފިނަމަ އެހެންވެސް އޮވެލާނެ އެހެން އެއްޗެއް ނެތްކަން ޔަގީންވާތީވެ ދޭހާ އަތްވެއްގައި ، ވެހޭހާ ވާރެއެއްގައި ވާލެއްހެން އެލިގެން އެއޮންނަނީއެވެ. ކުރާނެކަމެއް ނެތެވެ. މިއަދަކުދެން އިތުރު ގޮތެއްވެސް ނެތިއްޔާއެވެ. ރުކުގެ ވެރިމީހާއީ އުމުރުން ދުވަސްވެ އަބަހައްދަވެ އުޑުނުފެންނަ މިންވަރަށް އަސުރުން އިރުތިރިވެފައިވާ މީހެއްކަމުން ކުރީން ކިތަންމެ ޖައްބާރަސް މިހާރަކު ރުކުކުރިގަނޑުގެ ހާލަތުވެސް ބަލާލަން އިސްއުފުލާލެވޭ ވަރުނުވެ ފައިވާ މީހެއް ކަމުން އެސޮރު ރުކުތެރޭގައި އެލިގެން އެއޮންނަ ހާލެއް ރުކުވެރި މީހާއަކަށްވެސް ނޭނގެއެވެ. ހީކުރަނީ ހަމަ ތިމަންނަގެ ރުކުގެ މަތިވަރު އަދިވެސް ރަނގަޅު ކަމުގައެވެ. ކުރުނބާ ގަބުޅި ކާށިވެސް ހުސްނުވެ ހުރިކަމަށެވެ. ވަރުނުލާ ގަންނަ ކަމުގައެވެ.

ކޮންމެއަކަސް މިކަލޭގެ މިހެން އޮވެގެން ގައިގައި ވަރުޖެއްސޭތޯ ކުރާހާވެސް ކަމަކީ ހަރުހެން ހީވާ އިހަލުން ބަލައިގެން ކަނީއެވެ. ދަތުންވީދާ ހެހެގެން ރުކުގައިއޮވެގެން ބަނޑުފުރާން މުއްތި ކުރެވޭތޯ ބަލަނީއެވެ. ހައިވާވަރުން އެކަތިން ނުފުދުނިއްޔާ އަނެކަތިވެސް ކައިގެން ރެޔާދުވާލު އޭގެތެރޭގައި މަރުނުވެ އޮވެވޭތޯ ބަލަނީއެވެ.

އެއްދުވަހުން އަނެއްދުވަހަށް ހަރުއިހާތައް ހުސްވެ މިހާރަކުދެން އަނގަޔަށް ލުމަކުން މީރު ރަހައެއްދޭ ، ގޮހޮރަށް ލުމަކުން ބަނޑުފުރޭނެ ހަމަ އެކަތިވެސް ރުކަކު ނެތެވެ. މިހާރަކު ދެން އެރުކުން ފައިބާނެ ޖޯރެއްވެސް ހަށިގަނޑަކު ނެތެވެ. މީހަކު ރުށްދަށުން ކަރުކެހެލިޔަސް ބިރުން ފިލައެވެ. ދުވާލުދާ ހަތަރުދަމު ރުކުގައި ހަރުލައި އެއިން ދެތިން ފަނުގެ ތެރޭގައި ނިވާވެގެން އޮވެއޮވެފައި ބޭރަށް ބޯނެރެލަނީވެސް ރޭގަނޑު އެކަންޏެވެ. ތަންދޮރު ކުޑަވެގެން އުދުހޭ ވާލެއް ނޫނީ ބަނޑުހައި ކަމުން ކެއްނުވެގެން އެރުކަށް އަރާ މީދަލެއް ނޫނިއްޔަކާ ދެންމިހާރަކު ފޫހި ފިލުވާދޭން އެއްބައިވެލާނެ އެހެން އެއްޗެއްވެސް ނުފެނެއެވެ. މިހާލުގައިވެސް ރުކުކުރިން ދޫކޮށްލާ ހިތް ނުވެގެން ބާރަށް ބޮންތީގައި ބަށްދާލައި އިސްއުފުލާލައި ބަލާލާއިރު މާޅަނދޮޅުކޮށް ހެދި އުޑާވާހަކަ ގޮވާހިސާބަށް ހެދިފައި އެހެރަ ރުށްތަކުގެ ފުރިފައިވާ މަތިވަރު ފެނުމުން ހައްތަހާ އެވަނީ ކުޅުދިޔަލެވެ. ބަނޑުހައިކަން އިހުސާސްވާ ވަރު ހައްތަހާވަނީ އިތުރެވެ.

މިހާލުގައި އޮވެގެން ފަނަރަ ފޫޓެއްހާ މިރުކުން ފޭބުމަށް ތޭރަފޫޓުގެ ހަރުގަނޑެއް ދިއްކޮށްލަ ދޭށޭ ރޭގަނޑު ދަންވަރު ގޮވިޔަކަސް އެކަމަށް އިޖާބަދޭނެ މީހަކުވެސް ވަނީކީ ނޫނިއްޔާއެވެ. ތިންފޫޓަށް ސޮއްސާލެވޭނެހައި ހިއްވަރުވެސް މިހާރަކު ނެތެވެ. ހަރުގަނޑެއް ލައްކޮށްދިނީމައި ރުކުން ހަރުގަނޑުގެ ކޮޅާހަމަޔަށްވެސް ފޭބޭނީ އޭރުންތާއެވެ. އެކަމަކު ރުކުގައި އަޅާފައި ހުރި ކޫޑިތައް ކެއުމަށް އެރުކަށް އަރައި އެއުޅޭ ކަށިހިނި ފާޑުގެ ހިނިތަކެއް ގައިގެ އެތަންމިތަނުގައި ހަފާވަރުން ކެއްނުވެ ބަނޑުހައި ހޫނުކަމުގެ ދިލަޔާއެކުގައި ހަމަ އެލިގެން އެއޮންނަނީއެވެ. ފެނުނު މީހަކު ސަހަރޯވެރި ވާހާވެއެވެ.
އެކަމަކު އިންސާނެއް ވިއްޔާ ރަހުމުކުރާނެ ކޮންމެވެސް ބަޔަކު ތިބެންވާނެދޯއެވެ. ކޮންމެވެސް މީހަކު އެފަކީރަށް އެހީތެރިވެ ދީބަލާށެވެ. އެރުކުގައި މިހާރަކު މާގިނަދުވަހަކު ދިރިއޮންނާކަށް ކާލެވޭނެ ހަރު އެކައްޗެއްވެސް ނެތެވެ. ކިރިޔާވެސް އޮތްނަމަ އޮތީ ވަޅޯވެގެން ފަންވަޅެއްގެ ތެރެއަށް ވެއްޓިފައި އޮތް ދެތިން ގޮބޮޅިއެވެ. ދެންވެސް އަވަހަށް ދީވަލްޕާ ހެދިގެން ނޯވެ ރަންކޮޅާ ތިތަނުން ފޭބޭތޯ ބަލާބަލާށެވެ. އިސާހިތަކު އެހެންނޫނީ ވަރުހުސްވެ ރުށްބުޑަށް ވެއްޓި ގުދުބިންދައިގެން ހިނގައިދާނެއެވެ.

ދިވެހިރާއްޖޭގެ ކޯޓުތަކުގެ ޤާނޫނަށް ބައެއް އިޞްލާޙުތައް ގެނައުމަށް އެމްޑީޕީގެ ޕާލިމެންޓްރީ ގްރޫޕުން ރައްޔިތުންގެ މަޖިލީހަށް މިއަދު ބިލެއް ހުށަހަޅައިފިއެވެ.

އެމްޑީޕީގެ ޕާލަމެންޓްރީ ގްރޫޕުން މިއަދު ހުށަހެޅި ބިލުގައިވާ ގޮތުން ދިވެހިރާއްޖޭގެ ސުޕްރީމްކޯޓު އެކުލެވިގެންވަނީ، އުއްތަމަފަނޑިޔާރާއި، އެ ކޯޓަށް ޢައްޔަންކުރެވޭ 4 ފަނޑިޔާރުންނާއެކު، ޖުމްލަ 5 ފަނޑިޔާރުންގެ މައްޗަށެވެ. އަދި މިގޮތުގެމަތިން ސުޕްރީމް ކޯޓުގެ ފަނޑިޔާރުންގެ ޢަދަދު މި މާއްދާއިން ކަނޑައެޅުމުން ޤާނޫނު ނަންބަރު 2010/13 (ދިވެހިރާއްޖޭގެ ފަނޑިޔާރުންގެ ޤާނޫނު) ގެ 16 ވަނަ މާއްދާގެ (ހ) އުވުނީ ކަމަށް ވެސް މި ބިލުގައިވެއެވެ.

ޤާނޫނު ނަންބަރު 2010/22 (ދިވެހިރާއްޖޭގެ ކޯޓުތަކުގެ ޤާނޫނު) އަށް 1 ވަނަ އިޞްލާޙު ގެނައުމުގެ ޤާނޫނަށް ޢަމަލުކުރަން ފަށާ ތާރީޚުން ފެށިގެން ގިނަވެގެން 30 (ތިރީސް) ދުވަހުގެ ތެރޭގައި އެ ޢަދަދަށް ސުޕްރީމް ކޯޓަށް ފަނޑިޔާރުން ޢައްޔަންކޮށް ނިންމަންވާނޭ ކަމަށް ވެސް މި ބިލުގައި ވެއެވެ.

އަދި ހައިކޯޓު އެކުލެވިގެންވަނީ ހައިކޯޓުގެ އިސްފަނޑިޔާރާއި، އެކޯޓަށް ޢައްޔަންކުރެވޭ އިތުރު 6 ފަނޑިޔާރުންނާއެކު ޖުމްލަ 7 ފަނޑިޔާރުންގެ މައްޗަށް ކަމަށާއި، ދިވެހިރާއްޖޭގެ ކޯޓުތަކުގެ ޤާނޫނު އަށް 1 ވަނަ އިޞްލާޙު ގެނައުމުގެ ޤާނޫނަށް ޢަމަލުކުރަންފަށާ ތާރީޚުން ފެށިގެން ގިނަވެގެން 30 ދުވަހުގެ ތެރޭގައި އެ ޢަދަދަށް ހައިކޯޓަށް ފަނޑިޔާރުން ޢައްޔަންކޮށް ނިންމަންވާނޭ ކަމަށް ވެސް އެމްޑީޕީ ޕާލަމެންޓްރީ ގްރޫޕުން މިއަދު ހުށަހެޅި ބިލުގައި ވެއެވެ.

އެމްޑީޕީގެ ޢަދުލު އިންޞާފްގެ ވައުދު ފުއްދުމަށްޓަކާ ފެށި އިންޞާފްގެ ދަތުރު، މީޒާނުގެ ތިލަފަތް ހަމަ ހަމަ ކުރުމުގެގޮތުން މިހިނގާ ފެބުރުއަރީ މަހުގެ 17 ވަނަ ދުވަހު އެމްޑީޕީން ބާއްވާ ޞުލްޙަވެރި ބޮޑު އެއްވުމުގައި ބައިވެރިވުމަށްޓަކައި ރާއްޖޭގެ އެކި ކަންކޮޅުތަކުން މާލެ އަންނަން ބޭނުންވާ އެމްޑީޕީގެ މެންބަރުންނާ ސަޕޯޓަރުން މާލެ ގެނައުމުގެ އިންތިޒާމް ޕާޓީގެ ދާއިރާތަކުންނާއި، ގޮފިތަކުންނާއި، ވަކިވަކި ފަރުދުން ދަނީ ހަމަޖައްސަމުންނެވެ.

ރާއްޖޭގެ ޢަދުލު އިންޞާފްގެ ދާއިރާ އިދިކޮޅު ފަރާތްތަކުގެ ޚިޞާރުން މިނިވަން ކުރުމަށްޓަކައި އެމްޑީޕީގެ ފަރާތުން ފަށާފައިވާ އިންޞާފްގެ މި ދަތުރަކީ ރާއްޖޭގައި މިހިނގާ ވެރިކަމުގެ ނިޒާމާ އެއްގޮތަށް ރާއްޖޭގެ ޖުޑިޝަރީ ބައްޓަންކޮށް އަންނަނިވި ޖީލުތަކަށް އިންޞާފްވެރި ފަނޑިޔާރުގެއެއް ގާއިމްކޮށް ދިނުމަށްޓަކާ ކުރާ ދަތުރެކެވެ.

މިދަތުރުގައި ބައިވެރިވުމަށް މާލެ އަންނަ ފަރާތްތަކަށް މަރުޙަބާ ދެންނެވުމުގެ އިންތިޒާމް އެމްޑީޕީން ހަމަޖައްސަމުންދާއިރު، މި ސުލްހަވެރި މުޒާހަރާގައި ބައިވެރިވުމަށް ވަކިވަކި ފަރުދުންގެ ގޮތުގައި މިހާރުވެސް ގިނަބަޔަކު މާލެ އަންނަމުން އެބަދެއެވެ. އަތޮޅުތަކުން މާލެ އަންނަ މީހުން އައުމަށް ހަމަޖެހިފައިވާ ގަޑިތަށް ފަހުން ހާމަކުރާނޭ ކަމަށް އެމްޑީޕީން ބުނެއެވެ.

ދޭތިން އެކަށްޗަށް އެމްޑީޕީގެ މެންބަރުންގެ ހިއްވަރާ ޢަޒުމު ދައްކުވައިދޭ މިދެންނެވި ބޮޑު އެއްވުން ވެގެން ދާނީ ރާއްޖޭގެ އެންމެ ގިނަމީހުން އެއްތަނަކުން ބައްދަލުވެގެންދާ ފުރަތަމަފަހަރަށެވެ.

އިސްލާމް ދީނުގެ ނަމުގައި 23 ޑިސެމްބަރ 2011 ގައި ކުރި މުޒާހަރާއަށް ފަހު ތަކުރާރުކޮށް އިސްލާމް ދީނާޢި ކީރިތި ޤުރުއާނާއި ރަސޫލާގެ ސުންނަތާއި އުއްމަތުގެ ދަންނަބޭކަލުންގެ އިޖުމާއު އާއި ކަނޑައެޅިގެން ޚިލާފަށް، އިސްލާމްދީނަށް ގޮންޖައްސަވައި، އިސްލާމްދީނުގެ ޙުރުމަތް ކަނޑާލައި، މުސްލިމް އުންމަތެއްގެ މުސްލިމުންނަކީ މުސްލިމުން ނޫންކަމުގައި ބުނެ މުސްލިމް އަޚުންނާއި އުޚުތުންގެ ލޭ އޮހޮރުވުމަށް ގޮވާލައި، ޤައުމުގެ ވަލިއްޔުލް އަމުރާއި މުޙާތަބުކޮށް ބޭއަދަބީ ބަހުން ވާހަކަ ދައްކަމުންދާ ޝޭހުންގެ ސަބަބުން މި ކުޑަކުޑަ ދިވެހި މުޖުތަމަޢުގައި ދުވަހަކުވެސް އުފެދިފައި ނުވާ ވަރުގެ ފިތުނަ ފަސާދަ ތަކެއް މިއަދު މިވަނީ އުފެދި އާއްމުވެފައެވެ. ޒަމާނުއްސުރެ ދިވެހިން ގެންގުޅެމުން އައި އިޙްތިރާމްކުރުމުގެ މަތިވެރި ޙުކޫމަތަށް ބުރޫއަރައި ދިވެހިންގެ އަޚްވަންތަކަމާއި އުޚުއްވަތްތެރިކަމުގެ ކިއްލާގައި ރެނދުލައި، މުސްލިމު މި ކުޑަކުޑަ މުޖުތަމަޢު ފަސާދަވެ، ކުޑަކުދީން މުސްކުޅިންނަށް ކުރަމުން އައި އިހްތިރާމައި ގަދަރުނެތި މުސްލިމް އަޚުންގެ މެދުގައި އޮންނަންޖެހޭ އުޚުއްވަތްތެރިކަމުގެ މަތިވެރި އުސޫލު މުގުރި ދިވެހި ޤައުމު ފަސާދަ ވެދާދިޔުމަކީ މި ގޮފީގެ 50 އެތައް މެމްބަރުންނެއް އެކަމުގައި ކަންބޮޑުވާ ކަމެކެވެ.

ދިވެންނަކީ ޒަމާނުއްސުރެ ހަމަޖެހޭ ހަމަހިމޭން ޖައްވެއްގައި އުޅެމުން އަންނަ ހުދުމުޚްތާރު ވެރިކަމާއި ވަޔަށް ޖައްވަށް ފަޒާޔަށް ޖެހި އުންޑައިގެ އަޑުތަކާއި ފުޅިތޮއްޓާއި ޗިލީސޯސްގެ ބިރާއި ހިއްދަތިކަން ފަހަނަޅައި އިންތިޙާބާއި ދިމާކޮށް ދައްކާ ފޮނިހުވަފެންތައް ބިލާހަކަށްވެ، ޖެހި ކަޑަތަކާއި އެޅި ބިންގާތައް ބިމަށްދާވެދިޔަ ދުވަސް ތަކުގެ މަތިން އިބްރަތް ހޯދައި 11 ނޮވެމްބަރ 2008 ވީ އަންގާރަދުވަހު މިރާއްޖޭގެ ވެރިކަން ބަދަލުކޮށް ހިލޭ ބޭސްފަރުވާޔާއި ދަތުރު ފަތުރާއި، ބޯހިޔާވަހިކަމާއި އިޖުތިމާޢީ ރައްކާތެރިކަން އާދެ! އެކަނިވެރިމައިންނަށް އަޅާލާ ދުވަސްވީ މީހުންގެ އަގުވަޒަންކުރާ ނުކުޅެދޭ މީހުންގެ ނިކަމެތި އިހްސާސްތަކުގައި ބައިވެރިވާ ޒުވާނުންނަށް ވަޒީފާގެ އެތަކެއް ޕްރޮގުރާމެއް ހިންގައި، ނުވާނޭކަމަށް ވިދާޅުވި އެތައް ކަމެއް ކޮށްދީ ރަށުބަންދުގައި ވީ، އެތައް ބައެއް ރަށުބަންދުން ފިލުވައި އެތައް ރަށެއްގެ ބިންހިއްކައި، އެތަކެއް ފްލެޓެއް އަޅައި، ރާއްޖެގެ ތާރީޚްގައި ދުވަހަކުވެސް މި ރާއްޖެ ދެކެފައިނުވާ ފަދަ އިޚްލާސްތެރި ޚިދުމަތްތަކެއް ޤައުމަށް ކޮށްދެމުންދާ، މި ސަރުކާރުގެ އޯގާތެރިކަން ޚުދު ތިމާގެ މައިން ބަފައިންނާއި ދަރީންނާއި އާއިލާ އަށް ސީދާގޮތެއްގައި ލިބެމުންދާއިރު އެކަމަށް ގޮންޖައްސަވައި، ޤާނޫން އަސާސީގެ ބާރު ކަނޑުވާލައި ޤުރުއާނާއި، ހަދީސަށް ގޮންޖައްސަވައި، މުސްލިމުންގެ ލޭ އޮހޮރުމަށް ގޮވައި މުސްލިމު މުޖުތަމުގައި މުސްލިމު އަޚުންނާއި، އުޚްތުންގެ މެދުގައި ޖިހާދުކުރުމަށް ގޮވަމުންދާހިނދު، މި ޤައުމުގެ ތަރައްޤީ އާއި އިޤްތިސާދު ފުނޑު ފުނޑު ކޮށްލައި، އާއްމު ރައްޔިތުންގެ މުދަލަށާއި ތަކެއްޗަށް ނުހަނު ބޮޑެތި ގެއްލުންތައް ދެމުންދާ ހިނދު ޤައުމުގެ ސަލާމަތީބާރުތަކުގައި ތިއްބެވި ޤައުމު އެބަޔަކަށް ޓަކައި، ފަޚުރުވެރިވާ ކުޅަދާނަ ކާނަލުންގެ މަސައްކަތަށް ފާޑުކިޔައި، އެފަރާތްތަކުގެ އަގުވެއްޓޭ ގޮތަށް އަމަލު ކުރައްވަމުން މިދާ ދިޔުމަކީ މި ގޮފިން ނުހަނު ކަންބޮޑުވެ ހިތާމަކުރާކަމެކެވެ.

ޤައުމުގައި ހެޔޮވެރިކަމުގެ ނިޒާމެއް ޤާއިމް ވިޔަ ނުދިނުމަށް 30 އަހަރު މި ޤައުމަށް ޤައްދާރުވީ އަނިޔާވެރިން ހިންގަންމިއުޅޭ ޖަރީމާ މިހާރުން މިހާރަށް ހުއްޓާލައި މި ސަރުކާރުން މި ޤައުމުގެ ތަރައްޤީ އަށް ހިންގަން ބޭނުންވާ ބޮޑެތި މަޝްރޫއުތަކަށް ފުރުސަތުދީ އިދިކޮޅު ސިޔާސީ ވެރިންނާއި އަދުލު އިންސާފު ޤާއިމް ކުރައްވަން ނުދަންނަ ޤާޒީން މި ހާރުން މިހާރަށް މަޤާމުން އިސްތިއުފާދެއްވުމަށް ފަހު އިސްލާމީ ޝަރީއަތާއި އެއްގޮތަށް އަދުލު އިންސާފު ގާއިމް ކުރާ ފަނޑިޔާރު ގެތައް ޤާއިމްކުރުމަށް ދިވެހި ދައިލަތުގެ ވެރިޔާ އަލްފާޟިލް މުޙައްމަދު ނަޝީދަށާއި، ދިވެހި ރާއްޖޭގެ އުއްތަމަ ފަނޑިޔާރު އަލްއުސްތާޒް އަހްމަދު ފާއިޒް ޙުސައިން އަށާއި ދިވެހި ރައްޖޭގެ ރައްޔިތުންގެ މަޖިލީހުގެ 77 މެމްބަރުނަށް މި ގޮފީގެ 50 އެތައް މެމްބަރުންގެ ފަރާތުން ގޮވާލަމެވެ.

ޙަމްދޫން ރަޝީދު
( ގދ. ނަޑެއްލާ އެމް.ޑީ.ޕީ މެދުމިން ގޮފީގެ ރަޢީސް )

ފޮރުވިގެން އަޑީގައި ތިބިބަޔަކު މާލެތެރޭގައި ހިންގަމުން ގެންދާ ގޭންގް މާރާމާރީތައް ވަރަށް ކުރު މުއްދަތެއްގައި ޙައްލުކޮށް ރައްޔިތުން އަމިއްލަ ދިރުއުޅުމާ ތަރައްގީގެ ޙަރަކާތްތަކުގައި މިނިވަންކަމާ އެކު ދެމިތިބެވޭނޭ މާޙައުލެއް ގާއިމްކޮށްދެއްވާނޭކަމުގައި އެމްޑިޕީގެ ޕާލަމެންޓްރީގްރޫޕްގެ މެންބަރ ރައްޔިތުންގެ މަޖިލީހުގެ ތޮއްޑޫ ދާއިރާގެ މެންބަރުޢަލީ ވަޙީދު ވިދާޅުވެއްޖެއެވެ.

ރާއްޖޭގެ ޢަދުލު އިންޞާފް ދާއިރާ އިދިކޮޅު ފަރާތްތަކުން ކޮށްފައިވާ ޚިޞާރުން މިނިވަން ކުރުމަށްޓަކާ އެމްޑީޕީގެ ފަރާތުން ހިންގަވާ ޕާޓީގެ ވައުދު ” އަދުލު އިންޞާފް ” ގެދަތުރު މިސިލްސިލާގެ ދަށުން ރޭ އެމްޑީޕީގެ މައި ހަރުގޭގައި ބޭއްވި ޖަލްސާގައި ވާހަކަފުޅު ދައްކަވަމުން ޢަލީ ވަޙީދު ވިދާޅުވީ މިގައުމުގެ ޢަދުލު އިންޞާފް ނަގާލި މުއްލާއިންގެ ތެރޭގައި ހިމެނޭ ޢަބުދުﷲ މުޙައްމަދުގެ މައްސަލަ ނިންމަވައި، އޭނާ އެ މަގާމުން ދުރުކޮށް އޭނާގެ އަމިއްލަ ދިރިއުޅުމުގައި އޭނާ ގެންގޮސް ބަހައްޓަވައިދެއްވާނޭ ކަމުގެ ޔަގީންކަން ރައްޔިތުންނަށް ދެއްވާކަމަށާއި، ރައީސުލް ޖުމްހޫރިޔާއަށް ގާނޫނު އަސާސީއިން ލިބިދީފައިވާ ބާރުގެ ދަށުން ޖޭއެސްސީގެ ރައީސް މިހާރުން މިހާރަށް ހިފާހައްރު ކޮށް އޭނާ ހިންގާފައިވަ ޖަރީމާތަކުގެ މައްސަލަ ބެލޭނޭފަދަ ފަނޑިޔާރުގެއެއް މިރާއްޖޭގައި ގާއިމް ވެގެންދިއުމަކީ ރައްޔިތުންގެ އުންމީދެއް ކަމުގައެވެ.
ޢަލީ ވަޙީދު އަދި ވިދާޅުވީ ކުރީގެ ރައީސްގެ ކޮއްކޮ ޢަބުދުﷲ ޙަމީދުގެ މައްސަލައާއި، ކުރީގެ ރައީސްގެ އަނެއް ކޮއްކޮ ޢަބުދުﷲ ޔާމީނާއި، ދެންހުރި ކޮއްކޮ ޢަދުﷲ އަލްގީންގެ މައްސަލައާއި، ރައްޔިތުންގެ މަޖިލީހުގެ ނާއިބުރައީސް ދިއްގަރު ދާއިރާގެ މެންބަރު އަޙުމަދު ނާޒިމްގެ މައްސަލައާއި، ރެޑްވޭވް ސަލީމުގެ މައްސަލައާއި، ކުރީގެ ރައީސްގެ ޅިޔަނު އިލްޔާސް އިބްރާހީމުގެ މައްސަލައާއި، ކުރީގެ ރައީސްގެ ދަރިކަލުން ޣައްސާނު މައުމޫނު އެންދެރިމާގޭ މަތިން 6 ފޫޓުގެ ލަކުޑިބުރިއެއް ވައްޓާލައި، ޒުވާނަކު މަރާއި ހަނގުރާމަ ކުރަމުންދާ އެ ހިތާމަވެރި ސީރިޔަސް މައްސަލައާއި ގުޅިފައިވަނީ ކްރިމިނަލް ކޯޓުގެ މިލްކުވެރިޔާ ކަމަށް ދައުވާ ކުރައްވާ ޢަބުﷲ މުޙައްމަދު ކަމަށް ވީހިނދު މިއެންމެހައި މައްސަލަތަކަށް ފަސްއަޅައި ފޮރުވުމަށްޓަކާ އިދިކޮޅުފަރާތްތަކުން އެހިންގާ ޖަރީމާތައް އެމްޑީޕީގެ އިންޞާފްގެ މިދަތުރު ގައި ނިންމާލާނީ ރައްޔިތުން ބޭނުންވި ފަދަ ހަމަ ހަމަ އިންޞާފްވެރި ފަނޑިޔާރުގެއެއް ގާއިމްކޮށްދީފައި ކަމުގައެވެ.

ފަނޑިޔާރުގެ ޚިޞާރުން މިނިވަން ކުރުމަށް މިޕާޓީން މިމަހުގެ 17ވަނަ ދުވަހު ބާއްވާ ސުލްޙަވެރި އެއްވުމަކީ މިކަން ނިމުމަކަށް ގެނެވޭނެ ދަވަސް ކަމުގައިވެސް ޢަލީވަޙީދު ވިދާޅުވިއެވެ.

އިބްރާހީމް ރާމިޒް

މާލޭގައި އިދިކޮޅު ފަރާތްތަކުން މިހާރު ކުރަމުންދާ މުޒާހަރާތަކުގައި އިދިކޮޅު ފަރާތްތަކުން ފަށާފައިވާ ބިއްލޫރި ތެޅުމުގެ ސިލްސިލާގެ ދަށުން ރޭ، އެމްޑީޕީގެ ޗެއަރޕާސަން (ރީކޯ) މޫސާ މަނިކުގެ މަސްލަހަތު އޮންނަ ހެވީލޯޑް މޯލްޑިވްސް ކުންފުނީގެ ޕިކަޕެއްގެ ބިއްލޫރި ވެސް ތަޅާލައިފިއެވެ.

ހެވީލޯޑް މޯލްޑިވްސްގެ ޕިކަޕްގެ ބިއްލޫރި ތަޅާލާފައިވަނީ ރޭ، އެ ޕިކަޕް އާންމުކޮށް ބައްވާ ހެންވޭރު ކޮޅު ކާނިވާ ސަރަހައްދުގައި ޕާކްކޮށްފައި އޮއްވައި ކަމަށް ހެވީލޯޑް މޯލްޑިވްސްގެ އޮފިޝަލަކު ވިދާޅުވިއެވެ.

ހެވީލޯޑް މޯލްޑިވްސްގެ ޕިކަޕްގެ ބިއްލޫރި ތަޅާލާފައި މިވަނީ އެމްޑީޕީގެ އިސްވެރިންނާ ދެކޮޅަށް އިދިކޮޅު ފަރާތްތަކުން ހިންގާ މިފަދަ ލާއިންސާނީ ޢަމަލުތައް އެންމެ ހަރުކަށި ޢިބާރާތުން ކުށްވެރިކޮށް އެ ޕާޓީން އިއްޔެ ނޫސް ބަޔާނެއް ނެރެފައިވަނިކޮށެވެ.

އެ ނޫސް ބަޔާނުގައި، ވެރިކަމަށް ފެންބޮވައިގެންފައިވާ އިދިކޮޅު ސިޔާސީ ފަރާތްތަކުން މިހާރު މާލޭގައި ކުރިޔަށް ގެންދާ ޣައިރު ޤާނޫނީ މުޒާހަރާތަކުގައި އެމްޑީޕީގެ މައި އޮފީހަށާއި، އެ ޕާޓީގެ ގައުމީ މަޖިލީހުގެ މެންބަރު އަދި މިނިސްޓަރ އޮފް ހިއުމަން ރިސޯސަސް ޔޫތު އެންޑް ސްޕޯޓްސް އަލްއުސްތާޛް ޙަސަން ލަތީފްގެ ގެ ކޮޅަށާއި، އެމްޑީޕީގެ ނައިބު ރައީސް އަދި ރައްޔިތުންގެ މަޖިލީހުގެ ފޭދޫ ދާއިރާގެ މެންބަރު އަލްހާން ފަހުމީގެ މުދަލަށާއި، އޭނާގެ ޢާއިލާގެ ބޭފުޅެއްގެ ގެއަށާއި، އެ ޕާޓީގެ ޕާލަމެންޓްރީ ގްރޫޕްގެ ވިޕް އަދި ރައްޔިތުންގެ މަޖިލީހުގެ ހުޅުމީދޫ ދާއިރާގެ މެންބަރު އިލްޔާސް ލަބީބުގެ މުދަލަށް އިދިކޮޅު ފަރާތްތަކުން ދީފައިވާ ހަމަލަތައް ސިފަކޮށްފައިވަނީ، ދުރާލައި ރާވައިގެން ހިންގާފައިވާ ރަހުމްކުޑަ، އަނިޔާވެރި، ފިނޑި އަމަލުތަކެއްގެ ގޮތުގައެވެ.

އަދި، އެ ފަދަ ހަރުކަށި އަމަލުތައް ރާވައި ހިންގައި، އެފަދަ އަމަލުތަކަށް ފާޅުގައި ހިއްވަރުދޭ ފަރާތްތަކާއި، އެ ޢަމަލުތައް ހިންގަމުން ގެންދާ ފަރާތްތައް ހިފައި، ހައްޔަރުކޮށް ހަރުކަށި އަދަބު ދިނުމަށް ކަމާއިބެހޭ އެންމެހާ ފަރާތްތަކަށް އެމްޑީޕީގެ ނޫސް ބަޔާނުގައި ގޮވާލާފައިވެއެވެ.

ވެރިކަމުގެ ދަހިވެތި ކަމުގައި މާލޭގައި ހިންގާ ޣައިރު ގާނޫނީ މުޒާހަރާތަކުގެ ބައިވެރިން ރޭ ވެސް އެމްޑީޕީގެ އިސް މެންބަރު އަދި ރައީސުލްޖުމްހޫރިއްޔާގެ ޕޮލިޓިކަލް އެޑްވައިޒަރު އިބްރާހީމް އިސްމާޢީލް (އިބުރާ) ހިންގަވާ މަންދު ކޮލެޖާއި، ތިން ފިހާރަ އަކާއި ކެފޭއަކަށް ވެސް ވަނީ ގެއްލުންދީފައެވެ.

ރޭގެ ހަމަނުޖެހުމުގައި ރާއްޖެ ޓީވީގެ އެސިސްޓެންޓް އެޑިޓަރ ޔާމީން ރަޝީދަށް ވެސް ވަނީ ހަމަލަދީފައެވެ.

ދިވެހިރާއްޖެއަށް ފުރިހަމަ ޑިމޮކްރަސީއެއް ގެނައުމަށް ދިވެހީން ފަށާފައިވާ ދަތުރުގައި ސަރުކާރަށް އެކިއެކި ގޮންޖެހުންތަކާއި ފިއްތުންތައް ކުރިމަތިކުރުވައިގެން މާޟީގެ އަނިޔާވެރިކަމުގެ ތެރެއަށް، ޚުދުމުޚުތާރު ވެރިކަމަކަށް މަގުފަހި ކުރުމުގެ ހިޔަޅު ވިސްނުމުގައި އިދިކޮޅު ފަރާތްތަކުން ފަށައިގެން ކުރިއަށް މިގެންދާ ހަމަނުޖެހުން ތަކުގެ ސަބަބުން ބޭރުދުނިޔޭގައި މިތިބަ ދިވެހީންގެ އެކުވެރީންނަށްވެސް މިއަދު މިއޮތީ ލޮލުފިޔައެއް ޖަހާލުން ދަތިވެފައެވެ. މާލޭގެ މަސްރަހު މުޅީން ނާމާންކޮށް ނިންމާލައިފިއެވެ. އެންމެފަހުން އދ.ގެ ފެކްޓް ފައިންޑިންގ ޓީމްތަކުގެ އަމާޒުވެސް ރާއްޖެއަށް މިވަނީ ސީދާކުރެވިފައެވެ.
އިދިކޮޅު ފަރާތްތަކުން ގޮވަމުން އެގެންދަނީ މިސަރުކާރަކީ، ލާދީނީ، އަދި ދުނިޔެ ނުދެކޭވަރުގެ އަނިޔާވެރި ސަރުކާރެއްގެ ގޮތުގައެވެ. ރައްޔިތުންގެ އެއްވެސް ތާއީދެއް ނެތް ސަރުކާރެއް ކަމުގައެވެ. އަދި އެއްވެގަތޯ، ރަތްވެގަތޯގެ ތެރެއިން ސަރުކާރު ވެއްޓި އަލުން އާސަރުކާރެއް އުފަންކުރުވާ ނާއިބު ރައީސްއަށް ބައިއަތު ހިފައި ޑްރާމާ ކުޅޭތަންވެސް އެބަފެނެއެވެ. ގާނޫނެއް ގަވާއިދެއް ރައްޔިތުންގެ ހައްގެއް އެމީހުންގެ ދަހިވެތި އެދުންތަކުގެ ބިއްދޮށުންވެސް ދެކޭކަމަކަށް ނުވެއެވެ.

މިސަރުކާރު އައިސް ރައްޔިތުންނަށް އިޖުތިމާއީ އެކިއެކި އެހީތެރިކަން ފޯރުކޮށްދޭން ފެށިހިސާބުން އިދިކޮޅު މީހުންގެ ސިހެންފަށައިފިއެވެ. ” ރައްޔިތުން ރަތަށް އަރަނީ، ހަނާވަނީ ” ފަދަ ތީމްތައް ހިފައިގެން ނުކުމެ ދުވަން ފެށިއެވެ. ހީކުރީ ރައްޔިތުން އޮޅުވާ، މާރުކޮށް، ދެދުވަހުން ސަރުކާރު ވައްޓާލެވޭނެ ކަމުގައެވެ. ނަމަވެސް ވީކަމެއް ނެތެވެ. ސަރުކާރަކުން އެކަމަކާ އާހަށް އަރައި ހަފުސްވާކަށް ބޭނުމެއް ނުވިއެވެ. ސަރުކާރުން ފަށާނެ ކަމުބުނާ ކޮންމެ މަޝްރޫޢެއް ނުހިންގޭނެ ކަމުގައި ގޮވަމުން ދުވުނު މީހުން ދޮގުފޮތްތައް ހަދައި ރައްޔިތުންގެ ގާތުގައި ދެއްކި ވާހަކަތައް ރައްޔިތުންވެސް ގަބޫލުކުރިކަމުގައި ދެންނެވިދާނެއެވެ.

މީގެ ކުރީން ރަށެއްގެ ބަނދަރު ހެދުމަށް ކަޑަޖަހައި ފަސްއަހަރުގެ ހަތަރުދައުރާ ހަދައުރު ނިމުނުއިރު ހަދާންނުފެށުނު ބަނދަރެއް އަލަށް އުފަންވި ސަރުކާރެއްގައި، އިދިކޮޅު މީހުން ބުނާހެން ތަޖުރިބާއެއް ނެތް ބަޔަކަށް އެންމެ އަހަރަކުން ހެދޭނެ ކަމުގައި ސަރުކާރުން ބުނާއިރު، ތިރީސް އަހަރުން ހާހެއްހާ ފުލެޓު ނޭޅިއޮށްވައި ދިހަހާސް ފުލެޓު އަޅާނެ ކަމުގައި ސަރުކާރުން ބުނާއިރު އެކަން ގަބޫލުކުރުމަކީ ދަތި ކަމަކަށްވެސް ވާނެތާއެވެ. އެހެންކަމުން ރައްޔިތުންވެސް ރައީސް ނަޝީދަށް އިދިކޮޅު ފަރާތްތަކުން އެދިން ” ފުލެޓު ދޮންބެގެ” ލަގަބު އެއީ މަލާމާތުގެ ހިނިތުންވުމަކުން ބަލައިގެން ކަމަކަށް ހަދާލަން މަޖުބޫރުވީއެވެ. ނަތީޖާއެއްގެ ގޮތުން ރައްޔިތުންގެ މަޖިލީހާއި ކައުންސިލްތަކުގެ އިންތިޚާބުތަކުގައިވެސް ސަރުކާރަށް މާބޮޑު އިތުބާރެއް ނުދެވި ދޫކޮށްލީއެވެ.

މިއަދު ސަރުކާރުގެ ވައުދުތަށް ފުއްދުމުގެ ސްޕީޑު މެކުހަށް ޖަހައި މުޅިރާއްޖޭގެ ކަންކޮޅުތަކަށް ތަރައްގީގެ ކުލަވަރު އަމާޒުވެ ފެންނާން ފެށުމާއި، އިރުއަރައި އަލިވިލޭއިރުއޭ ބުނާހެން ބޮޑެތި ރަށްތައް ހިއްކާލުމާއި، ދެތިންމަހުން އެއާޕޯޓް އަޅައި ހައެއްކަހާސް ފުލެޓު ތިންއަހަރުން ކޮޅަށް ޖަހާތަން ފެނުމުން މިއަދު ރައްޔިތުން އެދަނީ އިންތިޚާބު ތަކުގައި ހެދުނުކޮސް ރަނގަޅު ކުރަމުންނެވެ. އަލުން ސަރުކާރަށް އޮތް ބޭނުން ބޮޑުކަމުގައި ދައްކައި ދެމުންނެވެ. ރަށެއްގެ ބަނދަރު ހަދަން ތިރީސްއަހަރުގެ މުއްދަތެއް ބޭނުން ނުވާކަމާއި، އެއާޕޯޓެއް އަޅާން ހައަހަރު ބޭނުން ނުވާކަން، މުޅިން އަލަށް ރަށެއް ހިއްކާން އަށް އަހަރު ބޭނުން ނުވާކަން ގަބޫލުކުރަމުންނެވެ. ނަތީޖާއަކީ މިސަރުކާރަށް ރައްޔިތުންގެ ތާއީދު ބޮޑުވުމެވެ.

ކުޅޭނެ ހުރިހައި ކުޅިޔެއް ހުސްވެ ބޮނދު ބެދުމާ، ޖަހާނެ މަންނައެއް، ކީއްކުރަން ހުކުމުގެ އެންމެ ގަނޑެއްވެސް އިދިކޮޅު މީހުންގެ އަތުގައި ނެތީމައި ދެން، މިޖެހުނީ އަގީދާއާއި ކުޅޭށެވެ. ބޮޑުތުނބުޅި ލައިގެން ވެރިކަމާއި، ފައިސާއަށް، ދުނިޔެ ރަންވެފައިތިބި ހައެއްކަ މީހުން ނެރެގެން ދީނޭ، ދީނޭ ގޮވައި މުޅިގައުމު ފަސާދަކުރާން ފެށީއެވެ. ޔަހޫދީންގެ ބޯޓޭ، ފަޅުރަށޭ، ވަޅުތެރޭ އޮތް ބޮކުގެ ބޮލޭ ގޮވަމުން ނުކުމެ ދުއްވައި ގަތީއެވެ. ބަޔަކަށް މިކަން ތެދުކުރެވި އެމީހުންގެ ފަހަތުން ދުއްވައިވެސް ގަނެވިއްޖެއެވެ. އެކަމަކު ދުވަހަކު އެބުނާ ބޯޓެއް ނުޖެއްސިއެވެ. އެބުނާ ފަޅުރަށްތަކެއްގައި ކާލިގަނޑު މިޔަރުގެ ދަތްޕިލާއެއްވެސް ހަރެއް ނުކުރެވުނެވެ. އުތުރު ކަރައިގެ އެކުވެރި އެންމެންނާ ދިމާލަށް ކޮންމެވެސް ބަޔަކު ލައްވައި ވަގަށްވެސް ގޮއްވައިފިއެވެ. އެމްޑީޕީގައި އެންމެ އިސްލާމަކުވެސް ނެތްކަމުގައި ގޮވައި އިސްތިހާރު ކުރަނީއެވެ. އަހަރެމެން މަރައި ސުންނާފަތި ކުރުމަށް އެތިބަގެން ކެތްމަދުވެ ތެޅިފޮޅެނީއެވެ. ދުނިޔޭގެ އެއްވެސް ގައުމެއްގައި މިގޮތަށް ރޭރުވެގެން އިދިކޮޅު ބަޔަކު އުޅުނުކަމެއް ނޭނގެއެވެ.

އެންމެފަހުން ދުނިޔޭގެ ބާރުތަކުން އެކިއެކި ބަސްތައް ބުނަމުން ސަރުކާރަށް ތާއީދު އިތުރުވެ ދާންފެށުމުން ބޭރަށްދިޔަ ގުނބޯދޫދު ވެސް ރާޑިވެ ރާއްޖެއައިސް ހަރަށް ވަނީއެވެ. މިމީހުންގެ ދިފާއުގައި ޖުއްބާ ލައްވައިގެން ގެންގުޅުނު ކާފޫރު ދެޔޯގާޒީ ފުނޑި އަވަދިވީމައި ގޮތްހުސްވެ އެވެސް މަރޭ މިވެސް މަރޭ ގޮވަމުން މިއަދު އެއުޅޭ އިދިކޮޅު މީހުންގަނޑު ތެޅޭތެޅުން ފެނި ކޮންމެފަދަ އެއްޗެއް ކޮށިއަރައިގެން އުޅެނީ ކަމުގައިވެސް ލާނެއް މީހަކު ބުނެދާނެތާއެވެ.

އދ ގެ ވަފުދެއް ރާއްޖެ އަންނަ ވާހަކަ ހަމަ އިވުމުން އެއްކަލަ ބިއްލޫރި ތަޅަމުން މަގުމަތީގައި ދުވުނު ގުންޑާތައް ރަމަތަ އަރައިފިއެވެ. ކަނޑު ފެންނަ ހިސާބުގައި މަޑުވެ މައިތިރިވެލައިފިއެވެ. މިހާރު ރޮއެހޭރި އާދޭސްކުރަނީ ރަށްރަށުގައި ދިރިއުޅޭ މީހުންގެ ކައިރީގައެވެ. މަގުމައްޗަށް ނުކުމެ ރޮއެލަދޭށޭ ނަމަވެސް ބުނެއެވެ. އޭރުން އދ ގެ ވަފުދަށް މުޅިގައުމު މިއުޅެނީ ސަރުކާރާ ހުރެ ނުނިދިގެން ކަމުގައި ހީކުރެވިދާނެ ކަމަށް ހީކޮށްވެސް ތޯއްޗެކެވެ. އެކަމަކު އިއްޔެ އެހަށްދުވަހަކު އެ އދ ގެ ހިއުމަން ރައިޓްސް ކޮމިޝަނަރ ރާއްޖޭގައި ދެއްކެވި ވާހަކަފުޅުތަކަކާއި ގުޅިގެން އެކަމަނާ މިގައުމުން ބޭރުކުރާން، މިގައުމަށް މުސްލިމަކު މެނުވީ އަޔަނުދޭން ގޮވައި ހަޅޭއްލަވަމުން ދީން ހިމާޔަތް ކުރާށޭ ކިޔައިގެން ނުކުމެ ފެށި ކުޅިގަނޑުކަން އަދިވެސް މިކުޅެނީ އެއުރެންވެސް ދަންނާނެތާއެވެ. މިގައުމަށް އަންނަހާ ފަތުރުވެރީންގެ ތެރެއިން މުސްލިމުން ނޫން މީހުންނަށް ޒަމާނުއްސުރެ ވިއްކަމުން ގެންދިޔަ ބަނގުރަލާއި، އޫރުމަސް ވިއްކާލައި އެސިނާޢަތު ނައްތާލައި، މަސާޖު ޕާލާތަކަކީ ހަށިވިއްކާ ތަންތަން ކަމުގައި ގޮވީމައި ސަރުކާރުން އެއަޑު އަހައިގެން އެކަން ހުއްޓާލަން ގޮވީމައި، ދެންވެސް ބުނީ ގެރީގެ ބޮލޭއެވެ. މިވެރީންނަކަށް ހަމަ ހެޔޮ އެއްގޮތެއްވެސް ނެތެވެ. ހުރިހައި އެއްޗެތި ފަޅު ރަށަކަށްލައި އަމިއްލަ ވެރިކަމެއް ގާއިމު ކުރުމުގެ ފުރުސަތު ދޭންވީކަން ނޭނގެއެވެ. ގައިމުވެސް އެ އެއްވާ މީހުންކޮޅަށް އާދައިގެ ފަޅުރަށެއްގައި އުޅޭކަށް ދައްޗެއްވެސް ނުވާނެއެވެ. ކޮންމެސް މިކަހަލަ ވާހަކައެއް ދައްކައިގެން ނަމަވެސް އދ ގެ ޓީމާ ކުރިމަތިލައި ބޭޒާރުނުވެ ސަލާމަތް ވެވޭތޯ ބަލައްޗެވެ.

މިހާރު މާލޭގައި ސަރުކާރާއި ދެކޮޅަށް ކުރަމުންދާ މުޒާހަރާތަކުގައި ދިވެހި ރައްޔިތުންގެ ގެދޮރާއި މުދަލަށާއި، ދަޢުލަތުގެ މުދަލާއި ތަކެއްޗަށް އަދި އާންމު ރައްޔިތުންނާއި އަމަން ބަލަހައްޓާ ފަރާތްތަކުގެ ފުރާނައަށް ނުރައްކާތެރިވާ ދަރަޖައަށް ކަންކަން ގޮސްފައިވުމާއި، ވިޔަފާރިވެރިންގެ ވިޔަފާރިތަކަށް ގެއްލުންތަކެއް ލިބިގެންދާތީ، މިކަންކަން ވަރަށް ހަރުކަށި އިބާރާތުން ކުށްވެރިކޮށް މިހާރުން މިހާރަށް މިކަންކަން ހުއްޓާލުމަށް މަޑުއްވަރީގެ އެމްޑީޕީގެ ގޮފިތަކުން ގޮވާލަމެވެ.

ޝަރުޢީ ނިޒާމް ހަމަމަގަށް އެޅުވުމަށް ދިވެހިސަރުކާރުން ކުރައްމުން ގެންދަވާ ބުރަމަސައްކަތް ހުއްޓުވުމަށް އިދިކޮޅުފަރާތްތަކުން ކުރަމުން އެގެންދާ މަސައްކަތަކީ މިޤައުމުގައި ކުރިން ވެރިކަންކުރި ހުދުމުޚްތާރު ވެރިކަމުގެ ތިރީސް އަހަރުގައި ކޮށްފައިވާ ކޮރަޕްޝަންގެ ޢަމަލުތަކާއި ހިންގާފައިވާ ޖަރީމާތައް ފޮރުވުމަށް ކަމަށް ވެސް މިރަށުގެ އެމްޑީޕީގެ އެންމެހާ މެންބަރުންނާއި ސަޕޯޓަރުން ދެކެމެވެ. އަދި ޤާނޫނީ ގޮތުން އިންތިޚާބްކޮށްފައިވާ ރައީސް މުޙައްމަދު ނަޝީދުގެ ވެރިކަމުގައި، މިގައުމުގައި ކުރިން ވެރިކަންކުރި ޚުދުމުޚްތާރު ވެރިޔާގެ ވެރިކަމުގައި ލިބެންނެތް، އިންސާނީ އަސާސްތައް ލިއްބައިދީ، ވެފައިވާ ވަޢުދުތައް ފުއްދައިދިނުމުގެ އިތުރުން ވެރިކަމުގައި ހޭދަކުރެއްވި މަދު ދުވަސްކޮޅު ތެރޭގައި ރާއްޖޭގެ ރަށްތަކަށް ގެނުވި ތަރައްޤީގެ ބޮޑު މަންޒަރުތައް ފެނުންވީ، ވެރިކަން ބޭނުންވެގެން ނިކުމެތިބި އިދިކޮޅު ފަރާތްތަކުގެ ހިތްތަކަށް ޖެހުނު ހާރޓް އެޓޭކެއް ކަމުގައެވެ.

ދިވެހިރައްޔިތުންގެ ޑިމޮކްރެޓިކް ޕާޓީގެ މެންބަރުންނާއި ސަރުކާރަކީ ލާދީނީ ބައެއްކަމަށް އިދިކޮޅު ފަރާތްތަކުން ބުނާ ބުނުން މިރަށުގެ އެންމެހައި މެމްބަރުން އެންމެ ހަރުކަށި ޢިބާރާތުން ތަކުރާރު ކުރުމާއި އެކު ކުށްވެރިކުރާ ކަމަށާއި، ސަރުކާރާއިމެދު ސާބިތު ނުހިފޭ ދޮގުވާހަކަތައް ފަތުރައި ރައްޔިތުންގެ މެދުގައި ޤާނޫނީ ސަރުކާރާއިމެދު ނަފުރަތު އުފެއްދުމަށް މަސައްކަތް ކުރަމުންދާ ފަރާތްތައްބަލައި، އަތްފުނާއަޅާ ހޯދައި، އެފަދަ ފަރާތްތަކަށް ޙައްޤު އަދަބު ދިނުމަށް ދިވެހި ސަރުކާރަށް ގޮވާލާ ކަމަށާއި، އަދި އިދިކޮޅު ފަރާތްތަކުން ދައްކާ ވާހަކަތަކަކީ ޤައުމުގައިވާ ހަމަޖެހުން ނަގާލާ މިޤައުމުގައި ހަލުވިކަމާއި އެކު ކުރިޔަށްދާ ތަރައްޤީގެ ޕްރޮގްރާމްތަކާއި، ރައްޔިތުންނަށް ލިބެމުންދާ ލުއިފަސޭހަތަކުގެ ވާހަކަ އޮއްބާލުމަށް ފަތުރަމުންދާ އެއްވެސް ޙަޤީގަތެއްނެތް ވާހަކަ ތަކެއް ކަމަށް އަޅުގަނޑުމެން ޤަބޫލު ކުރަމެވެ.
މިމުޒާހަރާތަކާއި އަދިވެސް އިދިކޮޅު ފަރާތްތަކުން އިސްވެތިބެ ރައްޔިތުންނަށް އަވާމެންދުރު ދައްކައިގެން، ސަރުކާރު ޒިންމާދާރުކުރުވުމުގެ ނަމުގައި ރާއްޖޭގައި ޤާނޫނީ ގޮތުން އުފެދިފައިވާ ސަރުކާރު ވައްޓާލުމަށް ކުރާ ތަފާތު އެކިކަންތައްތަކުގައި ރ.މަޑުއްވަރީ ދާއިރާގެ މެމްބަރ ވިސާމް އަލީ ބައިވެރިވަމުންދާތީ، މިކަން މިރަށުގެ އެންމެހާއި އެމްޑީޕީ މެމްބަރުންނާއި އަދި ސަރުކާރަށް ތާއިދު ކުރާ މިރަށުގެ އެންމެހައި ފަރާތްތަކުން ކުށްވެރިކޮށް މިފަދަ މުޒާހަރާތަކުގައި ބައިވެރިވުން ހުއްޓާލުމަށް އިއްޒަތްތެރި މެމްބަރަށް ގޮވާލަމެވެ.

ވިސާމް އަލީ ރ.މަޑުއްވަރީ ދާއިރާގެ ގޮނޑިއަށް މިދާއިރާގެ ރައްޔިތުން އިންތިޚާބްކުރީ ސަރުކާރަށް ޖެއްސުންކުރުމަކަށް ނޫނެވެ. އިދިކޮޅު ފަރާތްތަކުންކުރާ ތާކުންތާކު ނުޖެހޭ މުޒާހަރާތަކުގައި ބައިވެރިވެ ބޭކާރު ގޮތުގައި ވަގުތުތައް ނަގާނުލަމަށާއި، މަޑުއްވަރީ ދާއިރާގެ ރައްޔިތުންނަށް ލާބަޔާއި މަންފާ ހޯދައިދިނުމަށް އިއްޒަތްތެރި މެމްބަރަށާއި، ފިރިކަލުން، ރައްޔިތުންގެ މަޖިލީހުގެ މައިނޯރިޓީ ލީޑަރަށް ޑީ.އާރް.ޕީ ދޫކުރައްވާ ސަރުކާރުހިންގާ ޕާޓީއާއި ގުޅިވަޑައިގަތުމަށް މަޑުއްވަރީގެ އެމް.ޑީ.ޕީގެ މެމަބަރުންނާއި ސަޕޯޓަރުން ގޮވާލަމެވެ.

ބަޔާން ނެރުނީ:

ޖަމީލާ ޙަސަން - އަންހެނުންގެ ގޮފި
އަޙްމަދު މުޙައްމަދުފުޅު - މަސްވެރިންގެ ގޮފި
ހުސައިން ޝިހާމް - ޒުވާނުންގެ ގޮފި

އިބްރާހީމް ރާމިޒް

ފެބްރުއަރީ 17 ވަނަ ދުވަހަކީ ހަމައިން ނެއްޓިފައިވާ ރާއްޖޭގެ ޝަރުޢީ ނިޒާމް ހަމަމަގަށް އެޅުވުމަށް ދިވެހި ރައްޔިތުން ތެދުވާ ދުވަސް ކަމަށާއި، އެމްޑީޕީގެ އިންސާފްގެ ދަތުރު ނިންމާލާނީ މުޅި ގައުމުގައި އަދުލު އިންސާފް ގާއިމްކޮށްދީފައި ކަމަށް އެމްޑީޕީގެ ސްޕޯކްސް ޕާސަން އަދި ރައްޔިތުންގެ މަޖިލީހުގެ މާފަންނު އުތުރު ދާއިރާގެ މެންބަރު އިމްތިޔާޒް ފަހުމީ (އިންތި) ވިދާޅުވެއްޖެއެވެ.

ރޭ އެމްޑީޕީ ހަރުގޭގައި “އިންސާފުގެ ދަތުރު” ގެ ނަމުގައި ބޭއްވި ޖަލްސާގައި ވާހަކަދައްކަވަމުން އިންތި ވިދާޅުވީ ރާއްޖޭގެ ފަނޑިޔާރުގެ އަދުލު އިންސާފުން ބޭރުވެފައިވަނީ ޢިލްމާއި ހުނަރު ލިބިފައިވާ ޢަދުލުވެރި ގާޒީން ނެތުމުގެ ސަބަބުން ކަމަށް ވިދާޅުވިއެވެ. އަދި ތިމާ ހެއްދެވި ފަރާތާމެދު ބިރެއް ނެތި، ޙުކުމްތައް ކުރަމުން ދިއުމުގެ ސަބަބުން އަދުލު އިންސާފް ގެއްލިފައިވާ ކަމަށާއި، ޝަރުޢީ ނިޒާމްގެ ބޭއިންސާފް ޢަމަލުތަކުން މި ގައުމުގެ އަމާންކަން ގެއްލެމުންދާ ދިއުން ހަރުކަށި އިބާރާތުން ކުށްވެރިކުރައްވާ ކަމަށް އިންތި ވިދާޅުވިއެވެ.

ރޭގެ ޖަލްސާގައި ވާހަކަފުޅު ދައްކަވަމުން އިސްލާމިކް މިނިސްޓްރީގެ ސްޓޭޓް މިނިސްޓަރ ޝައިޚް މުޙައްމަދު ފާރޫޤް ވެސް ވިދާޅުވީ އިސްލާމީ ޝަރީޢާ ގާއިމްކުރެވޭނީ އިންސާފްވެރި، އަދުލުވެރި، ޢިލްމުވެރި، ޤާނޫނީ ގޮތުން ތަސައްރަފް ފުދިފައިވާ ޤާނޫނާއި އިސްލާމީ ޝަރީޢަތް މަތީ ފެންވަރެއްގައި އުނގެނިފައި ތިބި ބަޔަކަށް ކަމަށެވެ.

އިސްލާމީ ޝަރީޢަތް ބައެއްގެ މެދުގައި ގާއިމް ނުކުރެވިއްޖެ ނަމަ އެ ބައެއްގެ މެދުގައި ފިތުނަ ފަސާދަ އުފެދި، ގައުމުގެ މަސްލަޙަތު ގެއްލި، ގަދަ މީހާ ގަދަވާގޮތް ދިމާވެ، މިނިވަންކަން ގެއްލި ބިރުވެރިކަމާއި ނާމާންކަމުގެ ތެރެއަށް ގައުމު ވެއްޓިގެން ހިނގައިދާނޭ ކަމަށާއި، މި ސަބަބުތަކަށްޓަކައި އަދުލު އިންސާފް ގާއިމްކުރުމުގެ މަސައްކަތުގައި ބައިވެރިވުމަކީ ގައުމީ ވާޖިބެއް ކަމުގައި ވިދާޅުވިއެވެ.

ފެބްރުއަރީ 17 ވަނަ ދުވަހު ބާއްވާ އެމްޑީޕީގެ ބޮޑު މުޒާހަރާ އިންސާފްގެ ދަތުރަށް، ރާއްޖޭގެ އެކި ކަންކޮޅުތަކުން ދަނީ ތައްޔާރުވަމުންނެވެ. މި މުޒާހަރާއަށް ވަރަށް ގިނަ އަދަދެއްގެ ބަޔަކު މާލެއަށް އަންނާނޭ ކަމަށް ބެލެވޭއިރު، އެކި ފަރާތްތަކުން ދަނީ މި މުޒާހަރާގެ އިންތިޒާމްތައް ކުރުމަށް ދީލަތި އެހީތަކެއް ވެދެމުންނެވެ.

މީގެ އިތުރުން ކުއްލިޔަތުއް ދިރާސަތުލް އިސްލާމިއްޔާ ހިމާޔަތްކުރުމަށް ކަމަށްބުނެ މީގެ ކުރިން ރައްޔިތުންގެ މަޖިލީހުގެ މެންބަރުންނަށް ދޮގު މަޢުލޫމާތު ތަކެއް ދެއްވާފައިވާކަމަށް ރޭގެ ޖަލްސާގައި ވާހަކަދެއްކެވި ކުއްލިއްޔާގެ ކުރީގެ ލެކްޗަރާ އައްޝެއިޚް ޢަބްދުލް މުޢީދު ޙަސަން ވިދާޅުވިއެވެ.

ޝެއިޚް މުޢީދު ވިދާޅުވީ އެ މައުލޫމާތު ދެއްވި ފަރާތްތަކުންވެސް ޤަވާޢިދާ ޚިލާފަށް ކަންކަން ކުރައްވާފައިވާ ކަމަށެވެ.